ديوان الشاعرة مستورة الأحمدي {وله}

يحق لنا أن نفتخر بشأعرة متآلقه وهي الشاعرة / مستورة ضويعن الأحمدي الحربي {وله} يشرفني أن أضع امامكم ديوانها بقدر ما استطيع جمعه هنا في ملتقى حرب

تتعب ويتعب من يجاريك طغيان =يا تابع الواثق وقصـــدك تزِلّـه
دوِّر بمجهر,, سخِّر الأنس والجان =مالك سوى الخيبة وزورٍ تدِلّه
بي ضعف إنسانة,ولي عثرة إنسان =في كل أمر... إلا الدروب المخلة
دايم على قولي والأفعال ميزان =ترجح بكفه كل عثره ,وخِلة
أمشي على وضح النقا مشي سلطان= مثل الجبل مايخفضه دوس ظله
وأخفض جناحي من محبة وإيمان= وإن مِسَّت العزة فلله.....ولله
عندي كرامة تهزم اقلوب فرسان =هيهات تهزمني الدعاوي المضله
بنت الرجال اللي لهم كلمه وشان =واللي لهم بالدين منهج ومِله
متميزين بعلم مع حلم وإحسان =رضيعهم تلقى به اللي تجله
أفخر بهم ,وأمشي على نور الايمان= أترك حرام الدين وأعمل بحله
لي عين فأقدامي ودربي بها بان= ولي عقل في عيني ولا أحدنٍ يضله
ولي غايةٍ فوق المكايد والاضغان= منها يفت الغدر روحٍ تسله
واللي عجز لاياصل لشم الأغصان= قال الثمر حامض,,,ودمعه يهله
والشمس ماتحجب بمنديل شيطان =وماتنكر العين الضيا دون عله
قولي به الإنصاف والحق برهان= يجف به حلقٍ وحلقٍ يبله
واللي يبي لي ذل خسران خسران= يرجع حسير الطرف خاسي بذله

للقرابة

[poem=font=",6,,normal,normal" bkcolor="transparent" bkimage="http://www.m-harb.net/harb.jpg" border="inset,7,sienna" type=2 line=0 align=center use=ex num="0,black""]

دمعة هوت في نصف ليل المعاناة =تَرجِم هواجيس الألم من سمايه

في كف مرفوعة عن الناس لله =يجري وراها الهم ,تطلب حمايه

دمعة لها بحر , وقصيدة مقفاه =تَضَّبِط بوزن الشعر خطوة أسايه

لا تعترضها تنْعِت الدمع مجراه =مالك على صدق المشاعر وصايه

لا صاح دمعي:"ول"ماأقواه!,ما أقـواه =تطرب,,,,وتحسبها مراسم ولايه

قوة فجذبك حبل ود "ن" مددناه =أنا وآمالي ـ على الضــعف آيه

حبلي لجذب القلب ماهي مباره =أعتب على فهــمك وعاتب نقايه

في عرفك أسمى الحب فن "ن" وملهاه =وتظـن من قــلبي لقلبك مرايه

أبذل,,وماتبذل سوى الجرح وأدراه =وتفتي:العطا في الحب فرض الكفايه

مات الأمل والقلب , له رب يرعاه =والشعر في كل المآسي عزايه

ماكل عثرة حظ في العمر مأساه =بآقف بعزم أكثر وأسابق خطايه

وانفض ثيابي عنك وبلامبالاه =ألوح بكفي,, ولا انظر ورايه

كم ماضيٍ أولى بذكرى,,نسيناه =نسخة لأرشيفي فقط للقرايه

وأجمل هديه هاربه من نواياه =قصيدة "ن" تهجر ثراه لمدايه

العيد صبحك

العيد صبحك والهدية حضورك =اللي بشوفك يصبح العيد غايه
يشتاق فجر العيد ريحة بخورك=وأشتاق قولك: عيد وأنتي معايه
ألبس وأغير وأتخيل شعورك =وأمشط وأطيب ما هجرت المرايه
تشرب ثيابي العطر لحظة ظهورك =وأرقص لعطرك لا تخلل هوايه
أروح وأرجع أتحرى مرورك =أفل شوق القلب وأضفر شقايه
أردد أبياتك , وأقطع بحورك =أبغى التفوق في الغلا ياغلايه
الله يوم أشرق على القلب نورك =غابت حروفي وانكرتني خطايه
تفتح بشوفك في خدي زهورك=تبي تحس في نظرتك بالرعايه
كلي أمل أحظى ببسمة سرورك =وأقرأ في وجهك ما يسطر هنايه
ياليتني حبر الفرح في سطورك =يا غيث احيى بالمودة ثرايه

شرفة الضي

كفي بكف الشعر في شرفة الضي =واسمع غطاريف القلوب النقيه
ماجات بي موجه ترَاقص بحر غي =خطوي سمو ,وعرشي الأبجديه
جذري حفر في القاع يبحث عن المي =وتمـــــــتد أغصاني وتكسيه فيّه
ودربي صحاح وهمتي مالها زي =ما اختار غير "اول" لعزمي مطيه
وغيم ن يسد الشمس ويشح بالري =يا لله عساه بريحْ صرصرْ عتيّه
غصب يتلوى من فطـــــــوره لحم ني =وياشين من زاده مقفى خويه
لعقة عسل من شعرنا تشفي العي =وإن حار فيه الطب يبشر بكيه
الله شرع والله يحاسب على أي =أفعال تسبق في السراير بنيه
منطق سفانه عز وانجى بني طي =وخلّد تماضر مدح أسمى البريه
إيه ابدوية وأحلب المزن بيدي =واستبشر برعده وأعنّ لدويه
وازرع بذور الخير واستسقي الحي =في ربوةٍ فيها المعاني عذيه
ما ودي اخرج من جهادي بلاشي =أقلها والنعم بالاحمديه
افخر بحرب وكل مسلم لنا خي =نمشي بهدي الله وسنة نبيه
وامسك ذراعٍ حيَّرت قوته لَيّ =والحق غاية للنفوس الابيه
لو راودتك الريح عن مبدأك عي =يا طود تحرج هيبته جاذبيه
ومن يحرم اغصان الشجر وجبة الضي =لا ينتظر حلو الثمر في العشيه

سندااان شوق ومطرقة من كراااامة

وعي الحضور , وصمت ناطق وتصفيق =للصفوف شعرٍ صدق حسه إمامه
اسمى هدف للخافق اللي نسى الضيق =للعيون ترسم في سماه ابتسامه
مابين شوق وبين لهفة وتشويق =واحساس سابق في عيونه كلامه
نسي وهو يقرا وجيهٍ مطاليق =انه يبدي قبل وصفه سلامه
سلام مزهر حب من دون تنسيق =خارج سهو من سحركم عن نظامه
ياللي فضاكم يشبع الشعر تحليق =وبسمة رضاكم شاف فيها مرامه
وبشاشةٍ تلت حبال المعاليق =تل الرشا بذراع راعي العمامه
وبديت اهيجن وافقد الوعي وافيق =لاصفق الجمهور لاهة ندامه
وارجع واجر الاه واغص بالريق =من قلب نبض الشوق صحا سهامه
على امل ماجرته يوم تحقيق =ويضاف للخيبة وتكسر مقامه
كل الصور تفنى بحرقٍ وتمزيق =وتصهر ورود الشمع شعلة ملامه
الا انت حالة نادرة في المخاليق =محفوظ بين القلب واضعف عظامه
كفخت بجناح العيون المشافيق =عفت الظبا واخترت طرد الحمامه
فتحت بيبان الضلوع المغاليق =لو دس راسه خوف فرخ النعامه
ماكنك اللي خان كل المواثيق =وعهود تِمِرها بظل الغمامه
وماكني اللي كنت ما اسمع ولا اويق =واخرجت قلبي عمد عن اعتصامه
كم سقت رجلي عن دروب الهوى سيق =وما مال ظلي عن رصيف السلامه
وكم "لا "ابررها بحجة وتوثيق =لدرب الغرام وضاع عمري غرامه
اقضي الليالي بين انسى وماطيق =سندان شوق ومطرقة من كرامه
تعبت تمزيق ومدامع وتلزيق =لصورة بداية حب كانت ختامه
احوز عزة نفس تشرِف على طويق =وافوز شوق وينحدربي تهامه
متى تجيبك في طريقي التوافيق =قل ياهدف شعري وذروة سنامه
اقرا بيان القلب من دون تعليق =ومدد لمستوطن رضاك الاقامه

صحوة الميت "

قلبي قفز من فوق سوره , وحبيت =متى , وكيف ,وليه, لا تسألوني
غنيت:"أنت الحب"سلْطنت,واحييت =ليلة بألف وفارقتني شجوني
بايقاع قلبٍ به طربت وتماديت =وشعرٍ تحزَّم بي صرخ : رقْصوني
زرت النجوم وراقصتني وفلَّيت =جدايلٍ تشكي جفاها متوني
ومن فرحتي بجناح قلبي تعلَّيت =وكتبت في صدر السما :"أذكروني"
وقفزت فوق الغيم,صفقت, جنيت =وطبعت في خد القمر بعض لوني
وفتلت من نوره حبال ,وتدليت =ارجم بنجم الحرف داعي سكوني
ومديت ساقي للسحابة وبليت =ثوبي بغيمة شوق طاهر هتوني
شربت منها وارتوى الحلم واسقيت =النبت في قلبي , وشِعري, وكوني
أرض القصيدة لي وطن والسكن بيت =فاوزان فيها الحلم صدرٍ حنوني
حي الثريا, بعد يمكن وياليت =في قصر من فوقه تدلى غصوني
أصد لامني إلى الأرض لديت =من صغرها ضاعت فساحات نوني
ماعاد تجذبني ,وأنا اللي تحديت =كل العوايق ,وانتصرت ابجنوني
معقول فيها ضاق صدري وونيت =والحظ جر القلب جر الردوني؟!
معقول فيها كم بكيت وتمنيت =لحظة صفا, والحظ خيّب ظنوني
وكان الجزى هم وسهر حمد ما اعطيت =وشرب الندم لين ارتوى من عيوني
واليوم في عرش الأماني تجليت =واهملت ذكرى قرحت لي جفوني
دام الوله بارود, والشعر كبريت =به للفضا قلبي انطلق من سجوني
حبيت.....سابقت الخيال وتعديت =وغنيت للقلب الشقي :"فكروني"
والحظ كنه صابته صحوة الميت =متى ,وكيف , وليه لا تسألوني

" يمه "

يمه أنا والصبح والشعر والهيل =صحيت مواجعنا على طرق الأشواق
الشوق يجذبني إلى الأرض وأميل =أتخيلك في جوفها نبع رقراق
أحضن ثراها وأروي القلب تقبيل =وتدوسني ألام فقدك والإخفاق
لاجيت أغني تنتصبلي المواويل =تِرعدبك ضلوعٍ وتمطربك أحداق
يمه تعالي حلم في صفحة الليل =وتوسدي قلبٍ بذكراك خفّاق
لاتنكريني لو فقدتِ التفاصيل =أنكرت أنا الألوان بعدك والإشراق
بعدك محل أصدر بلاعدل تعديل =نشفت به أغصانٍ وطاحت به أوراق
هيا أمطريني طيف أرقى به سهيل =هيا احرثي أرضي تصافحك بالساق
اسقي ظما روحي محبة وتدليل =لمي شعث قلبٍ تصبر ولا طاق
لو تشتليني قرب قبرك عن الويل =امد لك جذري واطوقك بعناق
وامد ظلي فوق صدرك بلاميل =يتسلل لحجرك ويرقد في الأعماق
جتني سحابة حلم والصبح تأويل =وجهك ووجهه توأم لشمس الآفاق

طـــــــــــــــــــــــالق


تحت تهديد سلاح الطلاق تُستعمركثير من النساء وتُغلق قلوبهن بالشمع الاحمر

طالق إذا يخرج طموحك من الباب =أو يدخل أذني صوت زفرة غبينه
أو لو ترك دمعك أثر بين الاهداب =أو حسن وجهك لي عقــد حاجبينه
وإن صاح صوتك لي بشرهات وعتاب =وإلا بغير أذني طلبتي السكينه
وطالق إذا خطّــط مزاجك لاضراب =او قال لي مليت دور المكــــينه
وطالق و طالق ثم طالق إذا غاب =صمت الخضوع وقام يرفع جبينه
واحلف بطالق مرجله بين الاصحاب =ولاخير في رجل"ن" رجع عن يمينه
واكرم بها ضيف"ن" لفا وارهب اشناب =نوماس عن جد الجهل وارثينه
من غير ود ودون رحمه ترى غاب =معنى الزواج اللي غلط فاهمينه
زوجه مصون في عقد خدمه ولانجاب =نجــــاح يحسب من تعدد سنينه
وطليقة اول عام من دون اسباب =في واقــــــع الحب الذي حاقرينه
يا محول لباسك لفرشة على الباب =ظنتك ملبوس الدفا وانت زينه
وعاشت بمتعة حلم باهت وكذّاب =وحمل"ن" فغير الرحم يفسد جنينه
ماهو الهدف رغبة ولقمة وبواب =ونوماس "يا نعم الصبور الرزينه"
داست زهور الحلم خطوات حطّاب =يفرح إذا غصن"ن" يبس قبل حينه
وتمضي سنين العمر حسرات وارهاب =ويفوت ميعاد السعادة حسينه
ويهدي براعة صبرها سيد الغاب =شهادة التقصير .وأحلى طبينه

"الله يعز أهل العقال"


يظن بعض المنتسبين للرجولة والخائفين على مقاعدهم في صفوفها أن المرأة تسعى للحلول محلهم وأن نجاحها في إيصال صوتها يعني مزاحمتهم
ويعتبرون انتقاص المرأة في أي مجال وتقييد حريتها والسخرية من عطائها مضادات وقائية
لؤلئك مع التحية>

جدفي ياعزتي غير القلم مالك ذراع =دام ضو الشمس دربك ما مع الهمة محال
اصعدي موج المدامع وامسكي حبل الشعاع =واكتبي في صفحةٍ عنوانها "صعب المنال"
لا متى وحروف لقيتني تقَّدم للضياع =وجبةٍ حراقةٍ باشهى مشاعر وانفعال
حطمي جدران حبسك في تمرد واندفاع =واكشفي للنور مافي الفكر من حس وجمال
لا تحرين الصباح ان طابلك ظل القلاع =وحصن ما تبنيه ذاتك ما يصونك عن ضَلال
كان ديني ما بنا لي حصن عفة وامتناع =عن هوى نفسي ترى لابليس درب فكل جال
بالعمل في جنة الفردوس منزل وارتفاع =مايميز محسن ٍ عن محسنة غير الفعال
مابخس ربي لبنت حق أو عدّه مشاع =وما رفع عنها القلم أو خص بالجنة رجال
كم عقول ضيقة وعيون صاحبها وساع =تحسب التذكير مجد وتفتل الشارب جلال
مسلم الفطرة وعنده جاهلية فالنزاع =لا ذكر أخته يقول: "الله يعز اهل العقال"
كل مامديت فكري شبر مدّ اللوم باع =وان دعيته للشروق يقول لي شوفي الزوال
التعالي سلم الراقي على متن الضياع =جلّ من وحيه تضمن إسمنا فاسمى مثال
لا تسن سنونك العوجا لربات القناع =دونك الميدان واطلب في سبيل الله قتال
ياخسارة شعر يِكتَب للتهجُّمٍ و الدفاع =ارسمي يانفس أبعادك بحكمة واعتدال
كم حكم بالنقص ناقص عايش بذاته صراع =يحسبنه لانتقص حوا مرشح للكمال
ياقصيدة فاتنة بارقى المشاعر والطباع =ما تعذربك الأنوثه أو يحقِّرك المقال
سابقي أصوات من عدّوك من سقط المتاع =والمعي نجمه يزيِّن ضوها صدر الليال
واشرقي ياشمس تنكر ضوها عيون ٍ وجاع =وامطريهم ياسحابه خضّرت نبت الجبال
الهوي سيَّرك بامر الله لو مالك شراع =لارض تثمر من عطاك,وصلد عنه الغيث سال
واجدة آيات ربي صعب يحصيها يراع =بعدها لا قيل: أنثى ,قول: يا ما اسعدك فال

مخــــــرج طــــــــــوارئ


نحتاج لمخارج الطوارئ عندما نختنق بغاز الغدر السام وتشتعل النار في الأبواب التي دخلنا منها.

عذرك اللي من ورق أذكى لهيبٍ في قراري =للخيانه ألف باب وللفجيعه طعم واحد
لي زمن والحس يصرخ بي وأنا اكذب واداري =وانتظر صحوة ضميرٍ ميتٍ واحسبه راقد
كم سجارة كيف ترميها على صفحة خضاري =وكم تداركنا إلين امست مزارعنا مرامد
لِــمّ عن أرضي رمادك واطو ظلك عن جداري =خلني امسح هَباب الحب عن وجه المقاعد
لا تدور وسط بيت الخزي مخرج للطواري =عيش واضحك للهوى حتى تبكيك العوايد
ضحكةٍ تشرق على الشارع ومغربها فداري =والعيون تدس وجه الذنب فثياب الوسايد
من شرارة احرقت ثوبك فلحظات انصهاري =شفت وجه الغدر في صدرك وفوقه وجه بارد
تاركٍ زادٍ يخصك يحترق بأنفاس ناري =وأنت تاكل من خشاش الأرض أو تحت الموايد
وفر الدمعة ليوم ياخذ المولى بثاري =مالها تأثير في قلبٍ عليه الحمل زايد
مايرد الدمع لو تبكي سنه بعض اعتباري =جرب الدمعة بعد حضني على صدر المواقد
كيف غيمة ملح صيفية تخفف من مراري؟ =قلبي أولى بالحنان وغيرك أولى بالقصايد
لا ترجى ,لا تهجا عين تنطق باحتقاري =كل جرحٍ له علاج إلا الخيانة جرم خالد
ما بقي غير الهموم اللي تمادت فاختصاري =وذكرياتٍ كل مطلع ضيق تقبلبك تعايد
للأنوثة والمحبة والوله سقت اعتذاري =كم نصحتِك بالتصبر لين صار الظلم كايد
اسفه ياثوب ابيض صاح سحره من يباري =لاتثاوب صدره المنقوش هزّ البرد ساعد
وعطره الخايف من الفتنة تلقى الصبح ساري =وضاع في هذا الفضا مثل الأمل فانسان جاحد
وياشموعٍ ضوها يرقص بآهات احتضاري =نام فيها النور يبكي وابتسم وجه الشدايد
و امتزج كحلي بروج ٍ يغتسل في دمع جاري =للوحة متحركه بألوان والرسام جامد
نسخةٍ للذاكرة تُحفظ بتغليفٍ حراري =كل ما قلبي سها جدد له الطعنات شاهد
وشوف ياقلب تعذب من طموحي وانكساري =طعنةٍ ماتقتلك تصبح بها حذر ٍ وصامد