محشوم ماهو من طيور المغاريب --- اللي توصّف بالرخم والحنـــــــــادي

قصيدة قديمة مسندة من مؤرخ حرب الأستاذ : فائز موسى البدراني إلى الشاعر الكبير : بدر بن عواد الحويفي .

يالله ياسامع ندا العبد ومجيب = يامالك الدنيا ويوم التنادي
انت الحكيم وتعلم السر والغيب=ياعالم عنما يكنه فوادي
يارب تحفظنا عن الشين والعيب=عليك يالمعبود كل اعتمادي
ويارب تجعل صيتنا دايم الطيب=منك الهدا للحق ياخير هادي
وخلاف ذا جبت القلم والمكاتيب=مبداي ذكر الله علي كل بادي
واخترت للرحلة خيار المناديب=حرٍ على المطلوب غاية مرادي
يوصل تحياتٍ كما فايح الطيب=إلى اختلط مسكٍ وعنبر وكادي
والا كما ريحة فياضٍ معاشيب=اللي مطرها بين رايح وغادي
للصاحب اللي يحتمل للمواجيب=بدر الحويفي مسندي واستنادي
ترثة ربوعٍ يعطبون المضاريب=دفانة الركبه كعام المعادي
يابدر لك عندي معزه وتوجيب=والطّيب ابذل له حقيقة ودادي
وانشدك عن علمٍ قضبناه تهريب=هو صدق والا من توراه غادي
فان كان ماجانا حقيقه وتبويب=فاللي عثر بي يازميلي جوادي
كبوة جواد ولا تفيد العذاريب=وليا تردى الحظ راعيه رادي
لو يجتهد ماكل مجتهد امصيب=وكم واحدٍ يرمي على غير قادي
وان كان غزوتنا على غير ترتيب=فادمح خطا اللي للخطا مايوادي
تراي ماني من طوال المشاعيب=خصٍ على من ذاق شربي وزادي
احفظ رفيقي وابعد الشك والريب=ولا يشتكي مني خطايه عمادي
وان كان مخطي ماعن الحق تجنيب=ملزوم اعالج من بياضي سوادي
واعيال عمي كلهم لي اصاحيب=وان حسهم حاسوس ماني حيادي
حرصٍ على شرواك يامنقع الطيب= لا تفيض مع وادي وانا افيض وادي
وليا حصل عوجا على غير تصويب= يا بدر لا تنسى سواة المهادي
ومن فسر المعني على كل تقريب=تكثر ملاحيقه وراء كل عادي
واللي مجرب مايبي زود تجريب=يسلك مع اهل الحاضره والبوادي
والحر يغضي عن كثير المطاليب=الا ليا حده على الحد حادي
وانته معزب ماتّدور معازيب=وحنا ضيوف القيل حسب اعتقادي
يالشاعر اللي هذب الشعر تهذيب=لين اشتهر بالشعر في كل نادي
وعجل وخبرنا عسى العلم تكذيب=علمٍ لفا يا بدر ماهوب عادي
واسلم وسلّم ياكثير التراحيب=عبرت لك عما طرى في فوادي

وفيما يلي رد الشاعر الكبير : بدر بن عواد الحويفي :

يالله ياللي بالفلك تعلم الغيب = ياللي عليك بكل حال اعتمادي
ياوامرٍ موسى على جيرة شعيب = وبامرك نطق عيسى وهو بالمهادي
ياللي بحكمك تطلع الشمس وتغيب = ياباسط سبعٍ وسبعٍ شدادي
مرسي على وجه البسيطة غرابيب = محصي عدد حيوانها والجمادي
بك نستجير من الخطاا والنشاشيب = وعن حجة النقاد والأنتقادي
هذا ويوم القيل جاله هناديب = ونادى لمكنون القريحه منادي
اسمع كلام اللي كسا راسه الشيب = على النقا ماداس طرق السوادي
يامرحبا من مهجة القلب ترحيب = ترحيب مخلص مايكنه فوادي
بالصاحب اللي له علّيه مواجيب = وليّه على رجل المروه مبادي
أخص ابو تركي نزيه الأساليب = ساعات وصله من ليالي عيادي
ممنون للطيب وانا مع هل الطيب = ماحب يحصل بالنفوس انعقادي
وفايز نعده من خيار الأصاحيب = حرٍ ينومس صاحبه بالهدادي
طلعه ورى الهقوه عطيب المخاليب = فعله يشجعني وطلعه ركادي
محشوم ماهو من طيور المغاريب = اللي توصّف بالرخم والحنادي
رجلٍ فتح لمجاد ربعه دواليب = واحيا الفعول الماضيه والجدادي
ينفي عن الواقع اسلوب الأكاذيب = عن مصدرٍ ماثوق ماهو دوادي
والعرف والحنكه حظوظ ومواهيب = وفايز على الحنكه تسيطر وكادي
حامل شهاده بعد دوره وتدريب = وانا دروسي من طبيعة بلادي
وصنّف ووجّه لي بيوتٍ مساحيب = في خارطه ماتندمج في حفادي
أختار صافيها وخلى الغثاريب = ياكبرها من صاحبي ياهجادي
ماشوف لي فيها ملامس مقاضيب = ملسا هدفها يالديب امتيادي
وشطبتها في روس الأقلام تشطيب = ماني مدّخلها لسوق المزادي
خايف شرارتها تولع مشاهيب = يحول دون المستحيل العنادي
وان كان فايز مايهز المشاعيب = وعلى الرفاقه مايشيل الهوادي
مثله ترى ماني قريّب محاضيب = وعلى القرابه مايشرر زنادي
وان طب سوقي للمشاكل جلاليب = قصرت للباع الطويل القيادي
مابي طمع لمفتلين الأشانيب = لصار من بين النشاما طرادي
عنفي يهدي عنفوان الأصاعيب = قاسي ولين للرفاقه مقادي
ولاني على العالم موزع مصاليب =وعن مايثير الخافيات انفرادي
وليا حصل لي شتلةٍ بالعراقيب = مافيه داعي للبسيط الضمادي
الوجه سالم والسلامه مكاسيب = والناس تدري بالخطا والقوادي
ولو كل مادبت علينا دباديب = من بعض مانسمع هجرنا الرقادي
كم كلمةس قيلت وراحت ذباذيب =مايلفت الأنظار غير الوكادي
واللي يسربها مع الناس تسريب = اخف عقله من جناح الجرادي
ماهيب محتاجه تقصي وتنقيب = لاهوبها يقضي عليه البرادي
لاجمّدت نشفت حلوق الدغاليب = اللي تلوث بالنظيف الفسادي
يافايز الموسى حصان الأطاليب = ترى الهدف ماله بسيرك مسادي
من بيننا ما يدخل الشك وريب = نحو الهدف من بحر الأطلس وغادي
لهجه ملافيها قلوب النصاصيب = وعنها مجال الطيبين اتحادي
براتهم براة يوسف من الذيب = واللي يجادل صاحب العقل غادي
ختمتها بأشرف تحيه وتهذيب = والله يوفقنا طريق الرشادي
وصلوا على اللي حارب الشرك تحريب = على الرسول اللي للأسلام هادي

منقول

الاخ العزيز الغالي مريع العييل

حفظه الله ورعاه


دوما وافي وطرحك هادف وماتجيب الا الطيب من طيبك


لاعدمناك وبيض الله وجهك


وصوت وصدى ولا اروع

من كبار القبيله

وان كان غزوتنا علـى غيـر ترتيـب
فادمح خطـا اللـي للخطـا مايـوادي

الله يابو تركي.


لاجمّـدت نشفـت حلـوق الدغاليـب
اللـي تلـوث بالنظيـف الفـسـادي


ان من البيان لسحرا



تحيتي وتقديري

صح لسان الشاعرين الكبيرين وبارك الله فيك يامريع

الله يـعـطـيـك الـعـافيـــــــــــة يــابــن الــعــم

بيض الله وجهك

مشكور يامريع والله يعافيك

وصح لسان الحويفي والبدراني

كل الشكر

الف شكر لك يا مريع على أيراد القصيدتين

ونعم والله بالشاعر بدر الحويفي أشهر من نار على علم ويستاهل

ولا يهون مؤرخنا ابو تركي اللي كم أفتخارنا بكتاباته وأشعاره

لاهنت

شاكر مروركم جميعا .. لاهنتم

وفـايــز نـعــده مـــن خـيــار الأصـاحـيــب............حـــــرٍ يـنــومــس صـاحــبــه بــالــهــدادي
طلـعـه ورى الهـقـوه عطـيـب المخالـيـب............فــعــلــه يـشـجـعـنــي وطــلــعــه ركـــــــادي
محـشـوم مـاهـو مــن طـيـور المغـاريـب...........الــلـــي تــوصّـــف بــالــرخــم والــحــنــادي
رجــــلٍ فــتـــح لـمــجــاد ربــعـــه دوالــيـــب.......واحـيــا الـفـعــول الـمـاضـيـه والــجــدادي
ينـفـي عــن الـواقـع اسـلــوب الأكـاذيــب..........عــــن مــصــدرٍ مــاثــوق مــاهـــو دوادي
والـعــرف والحـنـكـه حــظــوظ ومـواهـيــب.......وفـايـز عـلـى الحنـكـه تسـيـطـر وكـــادي

عز الله ان ابو تركي ينومس ربعه وربعه تفتخربه عسى عمره طويل
وصح لسان الشاعرين الكبيرين ويعطيك العافية يالذيب مريع