قصائد الرثاء في شاعر الخليج صياف الحربي

بلا مقدمات
بلغ الحزن مبلغه

إبكي على صياف يا عيني = أبكي على موته وتوديعه
إبكي عليه إبكا المحبيني =لو مالهم حظ ٍ بتشييعه
إبكي عليه إبكا وبكّيني =قبل الخبر ينذاع وآذيعه
إبكي عليه اليوم ياليني = تجف من جفني مداميعه
إبكي عليه ان كان يوحيني = يالين توصلها مساميعه
إبكي عليه إدهور وسنيني =و أشهوره ويومه وأسابيعه
إبكي عليه الليل والحيني = ابكي بكا مشروع تشريعه
إبكي على اللي ذكرهم زيني = من بعدهم والملعبه ضيعه
بعده ترى ما عاد يشقيني = شعر النبط وزنه وألاعيبه
ويا شعر تكفى لا تبكيني =إليا قريتك في مواضيعه
ورحمتك يارب الثقاليني =في جنتك تجعل مرابيعه
قولوا معي آمين وآميني = عن نار ربي من مطاليعه

/


/

بلغني وفاة شاعر الجزيره والخليج صياف الحربي في هذا اليوم
رحمه الله رحمة واسعة( وانا لله وانا اليه راجعون)
ويشرفني ان اكون مع من اول من يرثيه بهذه البويتات والمعذره على القصور فوالله ان الدموع تسابق كتابة الاحرف
والحمدلله على كل حال

ياقاف في صياف غن الطواريق=هات البيوت اللي على الكيف ياقاف
بنات فكري قامت اطل وتويق=ولاني بشاعر كان ما ارثيت صياف
انا علّيه للنشاما مواثيق=اللي لهم في قمة المجد مشراف
قولو معي يا هل الوفاء يا مطاليق=مرحوم ياللي له مع الشعر ميقاف
الشاعر اللي وثق الشعر توثيق=ينعاه شعر الرد محراف محراف
وينعاك منهو في معانيك عِشيق=وتنعاك حرب اهل الوفاء روؤس واشراف
من غيبتك والشعر من ضيق في ضيق=واليوم جاله ضربة فوق الانجاف
وصياف من موته نشف عندي الريق=والحزن يبس بطن وديان وارياف
الموت حق ولا على الموت تعليق=لكن به بين العرب رؤس واطراف
يالله يارحمان والي المخاليق=علام ماتكتب ملايكة الاكتاف
ترحم فقيد بعد ماغاب ما اطيق=لا اقرى ولا اسمع عنه هرجه وسولاف
اللي موّرث له ذهب في صناديق=يالله عسى ما الشعر بعده بينعاف
الشعر باسمه شامخ المجد ويليق=باللي لعسرات المحاريف عساف

خولان بن عامر

السلام عليكم ورحمة الله وبركاته
كل الكلمات لاتعبر مقدار حزني على رحيل
الرمز
العلم
قلب المحاورة النابض
شاعر الخليج الأول
شاعر حرب
صياف السحيمي
رحمه الله وأسكنه فسيح جناته
وألهم ذويه الصبر والسلوان
وبسمي وبسم والدي ماجد بن محمد
وأخواني وبني عمي أعزي كافة قبائل حرب عامة
وذوي الفقيد وأولاده خاصة
وأقدم لكم هذه المرثية التي كتبتها قبل قليل حال علمي بالوفاة

ياحرب أعزيكم بعد موت صياف = عز الله انه راح منّا وليدة
له ماقفن ماهو مثل كل ميقاف = واللي خلقني انه اكبر فقيدة
مايجهل المعنى ولايعجزه قاف = وان جت بيوته وافيات وسديدة
بالملعبة عدى على كل مشراف = كن الشعر عبده وهو صار سيده
ماعمره اخطى او حصل منّه اخلاف = متواضعاً راع الفعول الحميدة
يدلك انه كامل بكل الاوصاف = من غيرنا تبكيه ناساً بعيدة
الموت حق وقبلنا راحوا اسلاف = يوم المدامع من فراقه وقيدة
يالله عسى الفردوس منزال صياف = ياواحدن بالكون حنا عبيده

تحياتي لكم
فايز السليمي

بسم لله الرحمن الرحيم
هذي قصيده رثاء في فقيد حرب وهو واجب علي كشاعر
ان ارثي احد اعمدة الشعر في الخليج .
اعزيكم واعزي نفسي في هذا المصاب الجلل وتغمده الله
واسكنه فسيح جناته ....

مرحوم ياصياف ياسيـد القـاف = مرحوم يافخري وفخر الحروبـي
مرحوم ياللي بالمواقيف ماخـاف = مثل الجبل ماحركتـه الهبوبـي
مرحوم ياللي زاهيه فيه الاوصاف = عن المراجل حالفـن مايتوبـي
قضى حياته عز مايرجع خـلاف = صادق والا قضا حياتـه كذوبـي
انا بكيتك يوم عايـش وتنشـاف = واليوم انا بللت بالدمـع ثوبـي
الشعر من بعدك كرهته وينعـاف = ماعاد من بعدك نبيلـه دروبـي
روح معك من يوم شالتك الاكتاف = وغابت معك شمسه قبيل الغروبي
يارب ياللـي بالمخاليـق رواف = ترحم عزيزن مسكنـه بالقلوبـي
اعداد من صلى فبيتك ومن طاف = واعداد ماحزنت عليه الحروبـي

أحمد السحيمي
رحم الله صياف واسكنه فسيح جناته
ان لله وان اليه راجعون

جاني خبر زلـزل كيانـي ونيـت=ونيت ونة من فقد شخـص غالـي
قالو توفى شاعر العـز والصيـت=صياف ابـن عـواد راع الكمالـي
وسرحبي الهاجوس لحضه وسجيت=وهلت عيوني دمعهـا ثـم سالـي
وبكيت انـا والله يانـاس وبكيـت=كل الذي عنـدي وحولـي بكالـي
مرحوم يلي للمراجـل لهـن بيـت=تجمعن وسطـه مـن اول وتالـي
ومرحوم يلي للملاعب اليـا جيـت=تصرفلها صرف الذهـب ماتبالـي
كم طايشاً بالـراي رديـت رديـت=رديت طيشه بالمعانـي الجزالـي
عن ماقفـك مايـوم والله تخليـت=في كل مارد لـك حبـالً طوالـي
ويالله ياغفـار ياحامـي البـيـت=ترحم ابو مفلـح كريـم السبالـي
ويالله يامعبـود يامحيـي الميـت=ظلـه بظلـك ياعزيـز الجـلالـي

طلال الجوال

أبيات قليله في رثاء أحد أعمدة الشعر في الخليج العربي الذي قرأت نبأ وفاته هذا المساء
غفرالله له ولجميع المسلمين وقد كتبتها على إستعجال فأتمنا قبولها :
صياف الحربي يرحمه الله

ماني مصدّق الخبـرقمت أعيده= صياف مات وسطرتهاالعناوين
بـالمنتـدى أبحـث أدور قصيـده=.شفت الخبرقلّب جميع الموازين
يـالله ياكاسـي خضـار البديـده= تجعل مقره جنـة الخلـد أميـن
ياواحـد ٍ باللطـف يرحم عبيده=أغفرله الزلات يامنـزل التيـن
عساك ربي بالحسـاني تزيـده=وتثبتـه يـارب كـل المسلمين
صياف رجل ٍ له مزايا عديده= يشهد له الأبعاد والا القريبين
فيه السجايـا كـل أبوها حميده=. ياما أسمعوله بالقصايد ملايين
ياحـرب والله راح منكم فقيـده=. صياف رجل ٍلاحضر كالبراكين

أبوإبراهيم

هاذي الابيات رثاء بشاعر قبائل الخليج العربي صياف الحربي
رحمه الله

بحر الرثا قاعه وصلته بلاحضات = وخترت من زين المثائل مثائل
وترجمتها فوق القراطيس ببيات= ابيات في حق السحيمي قلائل
ولو القصيد يرجع الميت لامات = قصدت لين انام تحت النثائل
صياف اخذ في ساحة الشعر جولات = ولحق ربوعه كسبين النفائل
لحق الثلاثه عاسفين الصعيبات = عون الريفيق معدلت كل عائل
مرحوم يا من لك مع الشعر وقفات =مروم ياشاعر جميع القبائل
شاعر ثقه ماهو بشاعر مسجات = اثبت وجوده يوم قدح الفتائل
قبل القصيد يصير بلنتخابات = ومن شاشة الجوال ترسل رسائل
اربع عقود يصوغ زين العبارات = ويتابعه جمعاً من الناس هائل
اسمن لمع ما بين كل المحيطات = ودخل بتاريخ الرجال الاوائل
قبل العرب لشعر تسس محطات = تنقل قصايدهم ضهور الرحائل
لامكتبن ينشر ولابه قناوات= زين الكلام مثبتاً بدلائل
ما شعرهم بلجمهره والدعايات =وفلان فيه اقصور وفلان طائل
ويا الله يالي لك تصلا الصلاوات = ترحم فقيد الشعر واف الخصائل

يحسن عزانا يالربع مات صياف=راح الزعيم اللي علينـا فقيـده
ستين عامن يحتمي كل ميقـاف=ويبين فعلـه بالمواقـف وليـده
ستين عامن والعلم فوق مشراف=باسـم القبيلـه رافعـه ميكيـده
يحير خصمه منه في صنعة القاف=يفتل وينقض كل معنـن يجيـده
شجيع ماهو بالمواقـف خـواف=قلبه على خصمه سوات الحديـده
الشعربعـده يرجـيـل ينـعـاف=راح البطل راع العلوم المجيـده
سطر فعوله بالمهمـات تنشـاف=رحل لكن الطيب بعـده رصيـده
يالله يالي تدبل الحسنه اضعـاف=يواحـدان يعلـم بنيـة عبيـده
ياخلقن ذا الناس من كل الاصناف=والفرق عندك باختلاف العقيـده
ياللي عبيدك تستعيلـك وتطـاف=يامحييـن درالعضـام الهميـده
طالبك يالله تجعل ذنوبه اخفـاف=وانك تمـده بالثـواب وتزيـده
واتبعه درب الصحابه والاسلاف=وجعل الشهاده يوم يحشر تفيـده

الشاعر ممدوح محمد البدراني

قال الذي يكتـب قصايـد جزيـلات=إمن الريـاض ومسكنـه بالمدينـه
للجنه اللي عرضها ارض وسموات=يا جعل ابـو مفلـح يراهـا بعينـه
ذكره بقلبي حي ما مات مـا مـات=لو ان قبـره حـال بينـي وبينـه
شاعر على ما قيل رجـل المهمـات=يركي عليها لين صـارت عجينـه
يصرف بيوت الشعر صرف الريالات=صح اللسـان وبيـض الله جبينـه
يصوغها صوغ الذهب كل الأوقـات=ويجيبهـا مثـل الجواهـر ثمينـه
شاعر سواة إسهيل وسط المجـرات=وتلامـس إنجـوم الثريـا يدينـه
شاعر سـواة النيـر ولا الأبانـات=تحتار فـي لعبـه عقـول ٍ ذهينـه
راسي ليا جـات الأمـور الثقيـلات=مثل ما ترسـي بالبحـور السفينـه
صياف ما تصعب عليه الصعيبـات=إليا طغـى الدجـال يلـوي يمينـه
عشرين عـام ٍ كلبوهـا جميـلات=في خدمة الموروث راحـت سنينـه
من ساحة الشعار جاتـه شهـادات=راية شعر معهـا وقـار وسكينـه
يا صفحة التاريخ بالأحلى العبـارات=فـي قمتـك صيـاف وأموثقيـنـه
سجله الحافـل شمـوخ وبطـولات=من طيـب فعلـه كلنـا خابرينـه
ما عاد للقلطـه جماهيـر هيهـات=من بعد ابو مفلـح تراهـا حزينـه
تبكي على الأطلال في كـل حـزات=وقامت تعزي به حـروب المدينـه
تبكي عليـه ولا عليهـا ملامـات=ياهي غبينه حيـل ياهـي غبينـه
ما ودها بفـراق شيـخ المـروات=صياف ابـن عـواد يـا عارفينـه
وللجنه اليي عرضها ارض وسموات=ياجعل ابـو مفلـح يراهـا بعينـه

هذي القصيده مرثيه في الشاعر العلم صياف السحيمي رحمة الله عليه للشاعر محمد الجميلي الحربي

امن العياضي وجهت لي رساله = سطرين بس امن الخبر طحت مفجوع
كنت اتقهوى ثم جدعت البياله = موضوعها ذلحين عن غير موضوع
موضوعها ضيق خفوقي وهاله = حتى عيوني من حزن سالت دموع
تبكي على راع الوفا والجماله = اللي توفى ثاني ايام الاسبوع
مرحوم ياللي ما امهلت له لياله = عدة عوام من المرض طاح موجوع
تبكيه حرب وكل من هو بكى له = يبكي بدمعٍ صدق ماهوب مصنوع
اليا تذكر دون ربعه فعاله = دون القبيله كامله صوت مسموع
صياف ابو مفلح كريمه خصاله = في هامة العليا له المجد مطبوع
شاعر ويحسن فالمواقف مقاله = الشاعر اللي كل صعب له يطوع
اعزي انفسنا واعزي عياله = وانا ادري ان الموت للعبد مشروع
لكن يارحمان عندك عساله = في جنتك يارب منزال مرفوع
وترسل على قبره بنو ٍ خياله = صادق وقبره كنه بورد مزروع
ويالله يالمعبود تحسن مأله = لاجاء نهارن فيه شافع ومشفوع