رثــاء

حار القدم ياسمير مافيه مسيار = الرغبة الأولى ماهي رغبة له
من يوم غاب اللي لنا عز وإستار = والرجل عن بعض الطرق مستقله
ياساكنين الدار وش غير الدار = وش علم دار العز صارت ممله
خيم ظلام الدار من عقب الأنوار = وأنا عليه خيم الجو كله
ياتل قلبي ياملا عقب ماصار = تل الهزيل اللي خصيمه يتله
ونيت ونة من عليه الدهر جار= عقب الفرح والعز بغثر محله
في ساعة حرجة صديق الرخا بار = علة زمان وداخل الجسم عله
بين الضلوع أونس مثل صالي النار = وباقي إعظامي كنها وسط مله
على وليف غاب عن كل الأنظار = غيبة مودع والملا مقتفي له
من يوم أبو بندر على المتبع سار = سافر عزيز ولا طلب غير حله
ودع أكبار وودع أطفال صغار = تسعة من الأطفال في حاجة له
عليه عيني هلت الدمع مدرار = وعليه يرخص دمع عين تهله
اللي رحل ماباقي غير تذكار = محفوظة بالقلب مع صورة له
أخذ من الدنيا فقط تسعة أشبار = من الخام الأبيض ذرع مافصلن له
أدين بالاسلام وأومن بالأقدار = وهذا قضاء ربي وأنا صابر له
مرحوم ياللي ماسلك مسلك العار = ولو زل غيره مايجازي بزله
ولا عمرهم قالوا تطاول على الجار= ولا عمر مخطية السوالف مضن له
يصبر على غلطة زميله ولو ثار = يغضي تقل في ثورته مافطن له
يمشي على درب الشرف سر وجهار = به خف نفس وفيه زين الجبله
ماغيروا فكره غريبين الأطوار = حصن حصين ومجلسه ماتمله
في مجلسه تلقا أهل الكيف والكار = أهل الوجيه اللي قبل مسفهله
صريح في ممشاه مالف مادار = ودع أهل الدنيا نظيف سجله
اختاره الرحمن من ضمن مااختار = يالله عسى الجنة بعطفك جزا له
عسى مقره يوم زوغات الأبصار= في جنة الرحمن ينعم بظله
عساه يوم البعث من ضمن الأبرار = يالله عسى حسناته يضاعفن له
ياناقل الأخبار ياشين الأخبار = علم نقلته حط بالقلب خله
عقب الخبر هلت عيوني بالأعبار = وزهدت حتى في وجود الأخله
عفت الجميع وعودت عشري اصفار = مافهم من الواعظ وأنا مصغي له
ليت الليالي ياملا تعطي إنذار = وتعلم المخلوق وشمقبل له
وقبل الحدث ليت الزمن يعطي إشعار = يدري به اللي خالقه ممهل له
مار الزمان الله يجازيه غدار = اللي غفل في غفلته يستزله
قلته وأنا عندي إيمان بالاقدار = ماقدر الله للفتى صاير له
وأدر إن عند الله تحديد الأعمار = يسعى الضعيف وخالقه كاتب له
وأدر إن غيب الوقت من ضمن الأسرار = مما مضى عندي دليل وأدله
لكن حزين القلب يسلى بالأشعار = يشرح بها الملهود عن ماحصل له
ويندم على الغفلات ويورد أعذار = ويعتب على سود الليالي المضله
ليا شاف من الأيام ميلات وإدبار = قال السنين أيامها مانصفن له
ولوقت به ميلات ويساعف مرار= وكم من عزيز ذاق طعم المذله
قدامنا قد قالوا الوقت دوار = واللي يقدم من عمل باقي له
أقولها من عقب فكرت بابصار = وفكرت بادقاق المسايل وجله
لكن مع المكتوب ماتفيد الأفكار = الرجل يخطي في طريق يدله
والله بعون العبد مادام صبار = والرجل يذنب ويحدث منه زله
ياللي تجي بندر ليا رحت زوار = من الكلام اللي على البال قل له
أنته ولد سلطان من ناس أخيار = ساسك عزيز وغيرنا شاهد له
ان شفت من مس الدهر ضيم واعسار = عليك ياللي كل عقد يحله
صحيح لك ربع ومحبين وانصار = لاشك اذا حملك بنفسك توله
وتجنب أهل الحقد والناس الأشرار = خلك عزيز وصاحب السؤ خله
ترى بعض الناس خادع ومكار = مصادقك في حاجته يستغله
وبالناس نمام وبالناس مهذار = وفيهم خبيث بلا سبب فيه عله
وبالناس راعي شر للشر سمسار = حب الأذيه والأذى يستحله
وبيت الردى لابد يضعف وينهار = يفداك من بيت الردى منزل له
بيت الردى لو كان من عشرة أدوار = عن الرجال اللي تعرفه مزله
وبالناس أهل وقفه حصينين الأسوار = مثل الغصون المثمرات المظله
وبالناس أهل وقفه حصينين الأسوار = مثل الغصون المثمرات المظله
ولا حد بمقياس الرياجيل يحتار = الطيب واضح والردى معاكس له
هذا كلامي والمعاني لها أدوار = ومافات مات وكل شي بحله

ــــــــــــــــــــــــــــــــــــــــــــــــــ ــــــــــــــــــــــــــــــــ
رثا/ سلطان بن نغيمش الفريدي رحمه الله

	صح الله لسانك ولاهنت وسلم فكرك وبنانك دمت برعاية الله وحفظة

صح لسانك يابو خالد والله يرحم سلطان بن نغيمش
ويسكنه فسيح جنته وجميع امواتنا واموات المسلمين

صح لسانك مليون على القصيده
والله يـعـطـيـك الـعـافيـــــــــــة
بيض الله وجهك

بن فرهود الحربي
مضحي بن جمران
عقيد الخيل
مروركم وتاييدكم وسام اعتز به شكرا الله يحفظكم

صح لسانك يابو خالد والله يرحم سلطان بن نغيمش
ويسكنه فسيح جنته وجميع امواتنا واموات المسلمين

صح لسانك يابو خالد ورحم الله فقيدنا ابو بندر رحمة واسعة ويسكنه فسيح جناته
اثرت شجوني الله يغفر لك

وقاك الله من كل سوء يابو زياد وانا اكتبها حتى احصل على كلمة الله يرحمه من المسلمين

ابو خالد شكرا لك على هذه المعلقة
صح الله لسانك
ولاهنت

شاعرنا القديرأبو خالد

صح لسانك وبيض الله وجهك

والله يرحم سلطان بن نغيمش
ويسكنه فسيح جنته وجميع امواتنا واموات المسلمين

وإنا لله وغنا إليه راجعون