حليب خلفاتٍ لبنها يداوي

انا نويـت ارتـب الشعـر ترتيـب
واوصفه توصيـف وصفـة مـداوي
وكان الكلام يصيب ويخيب ويصيـب
يالله عساهـا ماتخـيـب الهـقـاوي
فل الحجـاج وجنـب الهـم تجنيـب
ولا تصير لـرزق نفسـك قصـاوي
دنيـاك مادامـت لقـارون وشعيـب
الموت بين الناس سـارح وضـاوي
سج القدم والرزق من عالـم الغيـب
اليـا خـرب جـو البلـد بالحكـاوي
مالـك ومـال مشذبيـن العراقيـب
اللي لهـم بيـن المـلاوي مـلاوي
لاشفـت دخـان الـردا فالمشاهيـب
جنب وخلـك عـن سنعهـم نحـاوي
الياحدروا فشعيب سند لـك اشعيـب
واتـرك علـوم مرهميـن الدعـاوي
ون جات من بين اللحـا والاشانيـب
ادرا شماتـة كـل نابـح وعــاوي
الله يبـارك فالصـدور المراحـيـب
والله يبـارك فاللـسـان الغـنـاوي
ون ضاقت صدور العرب شغل الجيب
ونحـر مداهيـل البـدوا والشـواوي
لابـارك الله فالصـدور المحاضيـب
ولا بـارك الله فاللسـان اللـغـاوي
ودوّر خوي ماضـي لـه تجاريـب
حطه على يمنـاك لاصـرت نـاوي
امعـرب الجديـن مايلحقـه عـيـب
متكانفيـنـه صادقـيـن الـعـزاوي
منين ماعنـز براسـه علـى طيـب
وقلبه على قطـع الفيافـي جـراوي
ونصه بيـوت مكثريـن التراحيـب
عـزاز النفـوس مبذريـن القهـاوي
اهل البيـوت العامـرات المحاديـب
اللي لهـم قلبـك شفـوق وشفـاوي
تلقـى معازيبـك ونعـم المعازيـب
اهـل السلـوم مزبنيـن الـجـلاوي
من اكلب اللي منهم الزيـر وكليـب
من ذمهم جاهـل وعاقـب وغـاوي
متربعـيـن بعالـيـات المراقـيـب
لو غمضت عين الرقـود الخـلاوي
ماحولهـم والله شكـوك وعذاريـب
الله يجنبهـم صــدوف الـبـلاوي
من غير قاصر في جميـع الاجانيـب
كلٍ لفعـل الطيـب كاسـب وحـاوي
لاجيتهم في جلسـة العصـر يالذيـب
راحت همومك يالضميـر الشقـاوي
سلم عليهـم ياعطيـب المضاريـب
وقلط على فعـل اليميـن الرهـاوي
على الشحم والبن والهيـل والطيـب
كمبودي (ن) وزنه ثقيـل وغـلاوي
ذيدانهم ترعـى السهـول المعاشيـب
مرباعهـا بيشـه وذيـك الحـراوي
البل عطايـا الله جـزال المقاضيـب
منايحٍ مـن عنـد جـزل العطـاوي
والبـل اليامـن غلقـن المزاهـيـب
لحتجتهـا مثـل الصديـق الفـداوي
يازينها لامن ضـوت شمـخ النيـب
تطوي فيافي لرض مثـل المطـاوي
نحورهـا كنهـا وسـاع الدوالـيـب
ورقابهـا علـط طـوالٍ عــراوي
وذانهـا شـرفٍ حـدادٍ مـذاريـب
رثم الخشـوم مجمـلات السحـاوي
وشدوقهـا متخـرعـاتٍ مهـاديـب
تشبه زعـل ورعٍ ضيـوق وحيـاوي
وجنوبها عـراضٍ طـوالٍ مغاريـب
مناويٍ تصعب علـى اهـل المنـاوي
وظهورها تحسـب عليهـا رواكيـب
انا اشهد انها مـن خيـار الرعـاوي
وبعد العشاء كل ابلـجٍ قـام ويجيـب
حليـب خلفـات لبنـهـا يــداوي
وجـا للمـزوح وللقصايـد تعاجيـب
سـوالـفٍ مابـيـن نـاقـد وراوي
ماهي سواليـف الخـدوش الدباديـب
ولاّ سواليـف الغشـيـم الـفـراوي
والنجر صوته يصدع اشوي ويغيـب
على سنـا نـارٍ حطبهـا غضـاوي
يحوفها مـن عـذب النجـر تعذيـب
متربـعٍ بوزانهـا الـقـرم هــاوي
يفـداه خبـلٍ مايعـرف المواجيـب
اللـي حياتـه والممـات امتسـاوي
يشفق على الشوارع الصفر والسيـب
والطـار والمزمـار واليمبـعـاوي
ونا هـواي البـر عسـر المطاليـب
مـع الزحـول مبعديـن الخطـاوي
البـر طـبٍ للجـروح المعاطـيـب
حتى لو امسي فيه ضامـي وطـاوي
هاذي مناة النفـس فطـره وترغيـب
اخيـر مـن جـو البـلاد السنـاوي
اصحابها ماهـم بمثـل الاصاحيـب
تغيـرت فيهـا الشيـم والنـخـاوي
ناسٍ صداقتهـم مصالـح وترهيـب
ماعاش فيهـا الاّ زبـون الرشـاوي
ومن الحسد ماعـاد فيهـا مشاريـب
جفت عقب كانـت عيـون ومـراوي
بغضي لهـا مافيـه شـكٍ ولا ريـب
روتينهـا ماهـوب يرحـم ويـاوي
اخيـر مافيهـا صـلاة المحـاريـب
ولجـة مواذيـن الاذان السـمـاوي
خلوني اسلى قبـل يغلبنـي الشيـب
لو عشت باقي كل عمـري رجـاوي منقووول

ون جات من بين اللحـا والاشانيـب=ادرا شماتـة كـل نابـح وعــاوي
الله يبـارك فالصـدور المراحـيـب=والله يبـارك فاللـسـان الغـنـاوي

===================================

ونا هـواي البـر عسـر المطاليـب=مـع الزحـول مبعديـن الخطـاوي
البـر طـبٍ للجـروح المعاطـيـب=حتى لو امسي فيه ضامـي وطـاوي

	صح لسان شاعرها وناقلها

صح لسان قايلها و ناقلها

اختيار موفق

يعطيك العافيه

وبيض الله وجهك على النقل الرائع

تقبل تحياتي