عــــالــــم الــــتــــاريــــــخ !!

على ضو النهار اللي كشف لي بعض ماعممت=أمورٍ لو تحس بخاطري ماباحت اسراري
تعالي ياهجوسي يممي من وين مايممت=أنا والشعر خويا حافظٍ قدره ومقداري
ليا من درهمت لي صادق هجوسي لها درهمت=اسيرها على ماأريد وأقطف ورد وأزهاري
ابكتب من حديث المعرفة شيء يثير الصمت =وأبا أشعل من شموع الذاكره مايضوي أفكاري
اسولف للموده عن سبب قصة لسان الشمت=وأبين للعذول إني تجاهلته وأنا داري
أسطر للزمن قصة وفاي وصد من نادمت=نتائج تجربه من واقعي تحكي بها اشعاري
انا تلميذ مدرسة الحياة ولا قست قاومت=أموت ولاصفقت من أجلها يمناي بيساري
ليا قدمت مادور مقابل كل ماقدمت=مادام الطيب مكسب والله إنه قمت اصراري
لأني لو يجور الوقت والأصحاب ماأستسلمت=لو يطول السفر لايمكن اشكي طولت اسفاري
ولامنه برك غيري بمحمله في حمولي قمت=ولاجاء واجبي ماني بدور عنه الاعذاري
ليا من جتني الزلة من الطيب صفحت وشمت=ولاجت من مساكين العرب عرضتها الذاري
أخذت الصبر حكمة والعقل نعمه ليا حكمت=إمورٍ ماتمس الوجه ماأشعل لاجلها ناري
رفيقي لاكسب بي طيب وأطروه العرب نعمت=أعد النور وأفخر في رفيق الطيب وأماري
ولا مني نصيته في لزومي وأعتذر مالمت=أبرر موقفه وأقول مابه طيبٍ إجباري
مادام إن كل شارب له مقص اعرف من قيمت=ليا مني بغيت ابني أعرف اسيس جداري
وأنا طرقي بها الدنيا ولو طال العمر مادمت=وأعرف ليا رحلت إنه مايبقى لي سوا أذكاري
عسى ربي يجملني مع اهل الطيب لاساهمت=ويسترني من ألسنة العواذل سر وإجهاري
أجيد الشعر فتل ونقض وليا قلت ماوهمت=اصوغ الجزل وأنظر قبل مدخالي لمظهاري
أجيب الدر والياقوت من عمق البحر لاعمت=أجيد أسلوب شد ألإنتباه ولفت الانظاري
أبا أدخل عالم التاريخ وأنحت صخر لاصممت=بيوتٍ من ذهب تثري ثقافة حضرة القاري
أروض شرد أفكاري ولا مني عطيت أكرمت=أدور بالسمان من النوادر وأترك الهاري
على شعري تبين بصمت أفكاري ليا بصمت=يميزني سلوبي والجزل عنوان مشواري
لو إن اللي كتبته مايعادل ربع ماستلهمت=لكن هاذي حقايق موجزه عن باقي أخباري
وأنا صادق ليا مني على بعض الامور اقسمت=كذا طبعي صريح ليا طرالي بالشعر طاري
لعب فينا المجامل يازمان الشين لين أظلمت=وصارت ضحكتك سيفٍ حديد وموس غداري
ترى ماعاد ينفع لو تحلل بعض ماحرمت=عرفنا نيتك واللي كتب رب الملا جاري
خلاص إلى هنا ياوقت يكفي كل ماحطمت=أنا مالك ورايه ثار لأجل تقول ابا ثاري