امّا تنال اعجاب كل الجماهير***والاّاعتبرها احداث فيلم(ن)درامي

سر ياقلم واكتب عن الحال تقرير=وسطّر على بيض الصحايف كلامي
الجاش هاض وهيّضتني التفاكير=والعين عيّت تهتني في منامي
يوم ان بنات الفكر جني مسايير=وردن كما يارد على العد ظامي
الشرّد اللي ماتجي في طوابير=الفاتنات النادرات الحشامي
مثل العسل لكن بحد السواطير=واعذب من شعور الغلا والغرامي
لاعانقتني اصخّر القاف تصخير=وتسوقني من تحت جنح الظلامي
لارض(ن)خلا فيها النفل والنواوير=يقتادني هاجوس شعر وهيامي
صالت وجالت في ضميري التعابير=وعلى الجزيله دايمن لي مرامي
لبستّها حل الذهب والاساوير=وسطّرت فيها مايثير اهتمامي
افخربها عند الرجال المسافير=واحقر بها اللي مايقدّر مقامي
لاشك مالي من وراها مخاسير=متجنّب(ن) درب العتب والملامي
اقدح زنادي لاوزنت المعايير=وافرض على كل الرجال احترامي
لو لازمي دونه الذيابه مساعير=باالصبر والحكمه قضيت التزامي
اجمح خطايا الاوّله باالمعاذير=ولاني شفوقن للزعل والخصامي
ومن عادها ماعوّدت له على خير=يجني ثمرها طعنت(ن)باالعظامي
تبان باالشدات روس الصقاقير=وتحت الثرى تندس روس النعامي
ومافات مات ولا تفيد التحاسير=ومايرجع اللي فات عض البهامي
ارجي الفرج في مقبلات المقادير=وادعي عسى الله مايضيع مرامي
قولن صرفته مثل صرف الدنانير=ناره على الوافين برد وسلامي