هذه القصيده في حفل قبيلة الحصنان من حرب في دخنه

أخواني ألاعزاء الكرام

أليكم هذه القصيده والتي ألقيتها في حفل قبيلة الحصنان من حرب

في مدينة دخنه بمناسبه فوز وتكريم مرشحهم الانتخابي

الاخ الشاعر / نواف بن عبدالله بن سند الحصني

إليا بدا الـلازم وجـات أوقاتـه=وقام الهجوس يصف جزل أبياته
صخرت قيفان المعانـي عجلـه=وسقت الجزايل سوق في مشهاته
فرايـدن مثـل الذهـب معناهـا=هي مطلب السامع وهـي مناتـه
وشغلت جيبي ثم زهمت الصاحب=اللي مع الطرقه عزيـزن ذاتـه
رفيقن ينومـس بكـل إعلومـه=وللخوه إمجرب بطيـب اصفاتـه
طيب وطيبه ورث وأيضا كاسب=فعـول يمنـن زودت طـولاتـه
ونصيت ربعن بالمواقف تعـرف=العزوه اللي كـل طيبـن جاتـه
في محفلن وسط الدياجي نـوره=كنه مدينـه فـي كثـر لنباتـه
فيه الرجال اللي تسـد الواجـب=وترحيبها ينطحـك فـي حزاتـه
أهل الكـرم والمرجلـه والطالـه=واهل الفعايـل والفعـل بإثباتـه
قومٍ لهم في كـل عليـا موقـع=ورجالهـم مافيـه مجـدن فاتـه
( حصنان ) والمليون نعم تـردد=في ذكرهم والمدح لـه بصماتـه
كفو كفو ياذخـر قـوم مزينـه=أهل النقا والسيف مـن سلاتـه
من حرب ربعي والعزواي حيـه=ربعي سند راسي وهـم ملجاتـه
ربعي قبيلة حرب طيب وفزعـه=عـز الرفيـق وللعـدو نكباتـه
قلته وانا من عوف مصدر عزي=اهل الشجاعـه والنقـا ساداتـه
عوف اللي إليا قام منهم عوفـي=قام السعد للـي طلـب قوماتـه
من واجبي في كل حفـل أجيله=أفخر بهم والرجل مـن كلماتـه
والليل هذا ليـل ماهـو عـادي=ليلن جمعنا من حسـن صدفاتـه
حضرت فيـه لربعـن أقدرهـم=وأجيب دعوة من لفت دعواتـه
جيت أتشـرف يمهـم وابـارك=وأهني اللـي رشحـوه عزاتـه
مبروك يالحصنان فوز الشاعـر=اللي كسبها وإعتلـى بصواتـه
حـرٍ قطامـي والسعـد قدامـه=والحـر دايـم بينـه طلعـاتـه
نواف راع الطيب فعله واضـح=ومن وقفه ربوعه بدت وقفاتـه
مبروك له في كـل يـوم وليلـه=ومبروك للـي دايمـه فزعاتـه
ومبروك للـي رشحـه ماقصـر=نال الثقه والفوز مـن عاداتـه
من عادة الطيب ينومـس طيـب=وهذا التكاتف شاهـدو ميزاتـه
ماياصـل إلا واحـدن يستاهـل=ونواف يستاهل وشفهـا جاتـه