ابدى بذكر الله الصمدّ احدّ واحد = اللي غشى سحابته رعد وبروق
سلام تسليم العرب والجدايد = حروف معناه على الطيب مطروق
يابو علي الله على القول شاهد = ولا يعلم النية من الناس مخلوق
يابن الرجال الوضع بالنفس زايد= وزادت بنا الدنيا على عوقها عوق
لاشك مثلك من رجال الشدايد = لك منزلة باخلاقك اللي سمت فوق
حيرة على ماشفت والجو سايد = في وقت بعض الناس باديه مدروق
يبدي لك الطيبّ وقلبه معاند = عكس الذي يبديه للحقد معشوق
الوقت منه الفكر والذهن شارد= كني بهالدينا على كف مصفوق
لوشفت حالي قلت للوعي فاقد = من غُث بقعاء صرت بالحيل محروق
متقوية تجلب علينا النكايد = في وقت طيبك يصدمه خُبث مطبوق
يابوعلي والعين خير الشواهد = فالمجتمع شافت وكم حكي منطوق
ياحر بعض الناس كب العوايد = لاعاد له فالحق ولا يكمْل حقوق
الله عسى من كان مفسد وفاسد= ويسئ بين الناس يموت مشنوق
عطني مقاصدهم وانا جيت قاصد= لك ياحسن بعد الفكر صار مخنوق
وختامها عداد قايم وقاعد = صلوا على من كان صادق ومصدوق