انا عقلي دليلي والدليل يصحح الغلطات =وتسمع وش نقول وكل كلمه وش يعادلها
ترى رجلن يقاضى الخصم وهو يجهل القضوات =تفوته حجته ماشاف مخرجها ومدخلها
وترى رجلن يقوم بغير حق تعقله الفلجات=وترى من ينطح المفلوجه اردى الناس واخبلها
وترى كثر المراوغ بالطريق يسبب النكبات=لاكن اقصد بمشيك واطلب ان الله يجملها
وخوذ الحق واعط الحق والاعمال بالنيات=وترى الرجل العوج عوجان ربعه مايعدلها
ولا تزعل ولاتعجل الى حولت بالمقالات=تمهل واختصر حجتتك بالحكمه وقللها
وماقل ودل يكفي الميستمع عن كثرة الاصوات=ويرجح في تماثيل الخصيم الي يمثلها
وترى ماكل الالسن بالكلام تحقق الغايات=ولا كل من تكلم ينقض الحجه ويفتلها
وترى كلمه تجيب الحق من قاع البحر لاجات=وكلمه تعمي القالات وتقطع عقايله
وترى للمرجله ساعه ولك في غيرها ساعات=والى مرتك ساعات المراجل قوم قابلها
علوم الطنفسه والدنفسه ماتقضي الحاجات = الى باوب لك الدرب السنع باوب وبتلها
ولا تهتم من دعوى توجه لك بدون اثبات =لو ان الخصم قلفعها على راسك وزلزلها
ولاتكذب على خصمك ترى من عادت الكذبات= اذا ماخربت تال العلوم تخرب اولها
يجوز لك الكلام الي تقوله وانت بالفضوات= وتنسى ان العلوم الها رجاجيلن تحللها
وترى كل الرجال رجال قبل تحده الازمات =ولاتعرف حصاد افكارها الا من تعاملها
وترى بعض العرب عرفه قصير ولاكن له هومات=ويحاول حل قالات الرجال وهو يجهلها
يكلف عرفه المحدود في شين فيه خوذ وهات =ويرجع بدون من نصف الدروب الي تطاولها
وتوكل واتكل والله هو الي يجبر العثرات =وإلى منه وضعك بوسط نعمه لاتبدلها
وتحرص واحترص واذهن ترى جيش النفاق ميات=يحلى بالحيا يالي تدفن في مسايلها
وتحرص واحترص واذهن ترى بعض الرجال افات =يزل بك القدم معها وتاقع في حبايلها
وتحرص واحترص واذهن تتيه بسبت الغفلات =ويطير ابك الهوا مع ناس ماتعرف دخايلها
وتجمل والجميله من عوايد طيب العادات =وتكرم واهل المعروف لاتنسى جمايلها
والى منك سلمت من العرب هي ابرك الحزات = رحمك الله والا الناس ماتقضي مشاكلها