عبدالرحمن السمين=
السلام ورحمة الله والثنـا والشكـر لله =والبيوت العامره بين العرب ثابت عمدها
لو نغيب سنين ونعوّد على فنجال دلـه =الوفا يبقى ولو أن الجنازه في لحدهـا
محمد البدراني =
مرحبابك وانت رجال الوفاء مذهب ومله =والرجال الطيبه شرواك ماننسى جهدها
لو تغيب سنين تقدير الرفاقه في محلـه =مالحقنا شكوك والدنيا كثيره في نكدهـا
عبدالرحمن السمين=
البقا مافيه مخلوق شكى من غير علـه =( والمطيه ما تقدم رجلها قـدام يدهـا )
الليالي دايره حسب الكواكـب والأهلـه =والعرب وشلون تطمع في بلد ماهو بلدها
محمد البدراني=
كل شيً ياطويل العمر هاته بالادله =لاتقدم حجتك قدام لاتقـدم سندهـا
الليالي دايره والرجل مايجهل سجله =مير خلك منتبه للاوله واللي بعدها
عبدالرحمن السمين=
العلوم اللي تجي وتروح في صدر المجله =هي تجي من بنتها والا تجينا من ولدهـا
يامحمد ماتجيك المرجله تحـت المظلـه =كود في قطع الفجوج الواسعه وأمر وأدها
محمد البدراني=
أن عقدت الحبل يارجال مايمكن تحلـه =لاتقدم لي بحاجه وانت ماتعرف عددهـا
خيلت ثم المطر يمكن على راسك تهله =مير شفلك ياطويل العمر خطه واعتمدها
عبدالرحمن السمين=
يامحمد مايعيش العز فـي بيـت المذلـه =مير لا تنشد عن عدود الروى واللي وردها
ماعليكم دام ماجتكم مثـل روس الأخلـه =ماخضعنا للوجيه ولا عبدنا مـن عبدهـا
محمد البدراني=
والله انا نمسك السياف لو سيفه يسلـه =اخذه من ظهر ريمه ثم احطه في عقدها
كم واحد لا ورد عد الروى حلقه يبلـه =وكم واحد لاورد عد الروى روح بيدها