المشاركة الأصلية كتبت بواسطة ســعود

ياسعود ما جتنا الليالي على الكيف=دنيآ نبيها تزين ومعاكستنا
منها تكبدنا العناء والتكاليف=نسبح بوسط أمواجـــــــــــــــها وتعبتنا
تعصف بنا الأحداث مثل العواصيف=لوساعفت للغير ماساعفتنا
إيشيب منها مفرق الراس وتخيف=اليا ومنا مكرها باغتتنا
ياليت ندري ويش وسط المضاريف= لكنها بالغيب ماعلمتنا
كم فرقت بين القلوب الموا ليف=تبعدبنا ياسعود ماقربتنا
والله يالولا هرج بعض الملاقيف=اللي اليا طب المجالس شمتنا
لا روح روحة واحد صدر معيف =مار الحياء والمرجله ما سكتنا

خالد تصوغ القاف وتحذف وتضيف=لين القصيده ناسبت وعجبتنا
ماساعفت دنياك يامكرم الضيف=لجدادنا اللي بالزمن سابقتنا
أصدورهم رغم العناء للملا ريف=أفعالهم نسمعبها هولتنا
غابوا وغاب العز بدروج الأرشيف=من بعدهم زرنا القمر بالسنتنا
أقفى زمان الجود والوجه والسيف=وقبل زمان أميرنا مصلحتنا
مرباع في لندن ومرباع بجنيف=شاشات عرض العولمه معرضتنا
صارت حقايقنا مزاج وتصانيف=أن ناسبت لصحابنا ناسبتنا
من لذت الفنجال ماكرم حنيف= لو قال دلة صاحبي ماروتنا
ياخالد ارقى فوق روس المشاريف=لاتلتفت لعلومهم مانقصتنا
العود لولا جمرة النار ماشيف=ولاصار طيب نقربه لشمغتنا
أكثر مقالوه العرب فيه تحريف=خل السلق تنبح ورى قافلتنا
بين الحسد والكذب والغش والزيف=منهم مجاهيم النوايا نصتنا
لو يزعل مخيلف ولويزعل خليف=دونك ليامن البلاوي بلتنا
لوك بجنب طريف وانا على السيف=طول المسافه ماقطعت معرفتنا
دنياء يابوناصر حلاها تخاطيف=انا فرحتنا عودة واحزنتنا..
الله يعز الدين رفعه وتشريف=ويعز عبدالله ملك مملكتنا..