ولىَ زمان الغزو ومطارد الخيل=والسيف وأمور الحياه الكليفه
اللي بها تطلع فعول الرياجيل=ويعد ذكر الرجل من فعل سيفه
أما أنتصر بعد اللقا والبهاذيل=والا قتل بين الجموع العنيفه
واليوم في نعمه وعز وتساهيل=أمن ورخا وأرزاق ربي كثيفه
وبالمال تصبح من خيار الحلاحيل=اللي لهم بالطيب دار ووظيفه
كرم وفزعه مع جزال المواصيل=وفعلٍ ينومس والسوالف طريفه
وينصونك رجال الوفا والمشاكيل=وكلٍ يحصل ماطلب حسب كيفه
والبخل ماله مع جنابك مداخيل=ومداتك أن مديت ماهي ضعيفه
وأن ماقدرت الطيبه والمفاعيل=وعجزت بالمال تعلى المنيفه
أجل زمان السيف يتعبك بالحيل=ومن خاف بذل المال مامنه خيفه
لاخير في مالٍ بليا محاصيل=الفقر أخير من الغناه السخيفه
المال لهل الطيب مثل الهماليل=اللي لها برقٍ يقدي رفيفه
والمال لهل البخل عيب وعراقيل=يصبح مذمه لو أصوله نظيفه
مالٍ ينزل صاحبه شر تنزيل=يقطعك يامالٍ تجيب الكسيفه
ومالٍ يعز الرجل ويعدل الميل=لاصار بيدين الرجال الشريفه
"والطيب" اللي مامعه مال لو"قيل"="طيب" تعجزه الليال المخيفه
يصير بعد القل بين الرياجيل=مثل الشجيع اللي عيونه كفيفه