حان الفرا ق وحان تشتيت الأحباب=واضن فرقانـا عريضـة طويلـه
مع الوليف اللي على البال ماغاب= طيفه يجينـي كـل يومٍ وليلـه
عليه قلبي بين الإضلاع من صاب= كنه يقلـب فـوق حـام المليلـه
والكبد أحس بوسطها تقل مشهاب= والحال من فرقاه صـارت عليلـه
ياعاذلي لو بعدنا ساسـه أعتـاب =مبكي عليـه أقـول يأتـي بديلـه
ماني على طرد المقفيـن مهـذاب =كلن علـى ماقيـل عقلـه دليلـه
لكن فرقانـا لهـا عـدة اسبـاب =الوقت فرق بيـن خـل وخليلـه
في ساعة الفرقا بكاء سيد الأحباب =وقال الوداع وشوفتـك مستحيلـه
حلفت له بالله قصـاف الارقـاب =لاجيه لـو دونـه تقفلي قبيلـه
واليوم من بعد البطا مرسل كتاب= كتاب من دمع العيـون الكحيلـه
يقول طال الوعد مابين الأصحاب= طول وعدكم يالرجـال الاصيلـه
اصبحت له مديون والوقت غلاب =الله توفـي مـن عميـل لعميلـه