البارحه والنفس كثرت همومها = عيني تعاف النوم لاحد يلومها
سهرت لين الشمس بيّن شعاعها = والنفس ياناشد ترادت علومها
واللي سألت الحال حالي سبايبه =نظره بسوق المول لاعاد يومها
دخلت سوق المول والنفس ساليه =تدله ولا كثرت عليّه همومها
امشي واغني والهبايب تهبني =وطيور السعد قدمي تعلت بحومها
دخلت لكني تحسفت ليتني = ماجيت سوق المول ساعة قدومها
من شفتها والروح تلعج بروقها = مادامها شنّت عليّه هجومها
وقفت حاير لين مالت بخصرها = ياويّ ميله صوبتني سهومها
تمشي غنج والحال هذي صوايبه = من شفتها والنفس كثرت حلومها
كثرت حلوم النفس والله يعينها = لعلها تهنى بحظً يقومها
والحب سلطان المشاعر وقلبها = ودنيا بلا حب تلاشت غيومها
اويّ خفره فاقت البيض كلهن = تحط زين البيض بأوسط كمومها
عيونها ورموشها مع دلالها = دكنّ بروحي لين خارت عزومها
وجريت ونّه يوم كتفي بكتفها = في ساعة نفسي تمنى بدومها
عمهوجة منها البشر بس هايمه = والخد لاهق والحلا في وسومها
الخد يسطع والمشاعر تسوقني = وروحي ببحر الحب يابعد عومها
اعوم بحر الحب ولانيب هايبه = دام الهوى العذري صفه من سلومها
مهره جموح بالتخاتيخ ذاعره = وتجفل ليا شافت ظلال يرومها
ومالوم بصري لو تكسّر عبايره =ومالوم ابن لعبون من بعد يومها
ومالوم روحً من هوى الزين تالفه = في ليلة ترقب عليّه نجومها
سهرت لين الصبح كف كف نجومها =والعين ماتهنى ولاطاب نومها
واللي يلوم الحال قله يلومها = دام المفاتن حاضره في قدومها
والا يوّقف ساعة في غرامها =حتي يضيّع شرقها من يمومها
وحتى يعذر النفس لاطق جولها =وقامت تهجرس .. والتوجد لهومها