يا غريقٍ في عيونه دمعته = من يشوفك ان بكيت او ما بكيت
الألم لو زاد وسطك جرعته = ما سمعك اقرب قريبٍ لو شكيت
غارت عيونك وودك رجعته = النسم يوم النسم باللي هويت
انقطع خوفك وراجي فزعته = خِلك اللي لقنك ليتٍ وليت
وش حصيلك منه وش هي نفعته = ليتك اللي عن وجوده ما دريت
الممات اللي يجدد نزعته = في طلوعه وانت منه ما شفيت
والحزن حرر بوجهك طبعته =حتى خوفك صار له صيتٍ وبيت
وش بلاك الوقت شايف سرعته = يعني اسمع كلمتي كانك وعيت
ما أبي قولي يوافق صفعته = وتّذكر بالندم كل ما نسيت
اللهيب اللي بجلدك لسعته = ما هقيت انك على ناره قويت
لو زجاج الحب غرّك لمعته = محتواه الذل كانك ما دريت
الهوى محدٍ تعلم صنعته = انشد اللي كان قبلك لو بغيت
هذا انا قبلك سبحت بمتعته = شوفني غرقان لا ميّت وميت