نايف إليـا جينـا مجلسـه مانملـه=عقب الشيوخ منزحيـن الطوابيـر
هذا ولـد ناهـس ينومـس محلـه=بالليـن وإلا بالليالـي المدابـيـر
ماصك بابـه والكـرم عـادة لـه=للي بعيـد الـدار واللـي مساييـر
لـه مجلـس كـل النشامـا تدلـه=مدهال طلقيـن الوجيـه المناعيـر
اميرنـا إليـا لبـسـن الأجـلـه=طـار اليقيـن وفرعـن الغناديـر
لعـل رديـان العـرب فـدوة لـه=تبوع الرجال القاصريـن المثابيـر
هو الأميـر وزايـد الهـرج خلـه=نفخر بنايـف بالليالـي المعاسيـر
أبـوه قبلـه حايـش المجـد كلـه=ماله حلي ياكود جسـاس والزيـر
وفيحـان ماجابـنـه البـيـض لله=عندي وكـل لـه مظنـه وتقديـر
فيحان سبـاع الخـلا ينحبـن لـه=معشي الهجافا والسبـاع المغاويـر
كم راس عزه عقب هـون ومذلـه=بالجاه والحيلات وفـك المواسيـر
ومن جاه يطلب نجدته وفزعـة لـه=معه يسوق الجـاه غيـر الدنانيـر
وكم سجين فيحان كـان فـرج لـه=بين الرجاء والياس عند الجزازيـر
أطلق سراحه بدون ياخذ جـزاً لـه=وشاف الفضاء عقب المذله وتعزير
عطوه مقدار الجاه كله رضـاً لـه=ليـن أخـذه منـا ولـي المقاديـر
وهندي ولد ناهـس زبـون المتلـه=خيـال وضـح ربعـن بالدعاثيـر
وادي الرمه بالسيف الأبتر حمى له=ماكفته الحبلاء وشمال مـن النيـر
ومحمد أبا الروس كـم راس شلـه=سيفه ينثـر ساخـن الـدم تنثيـر
ضد الخصيم وبالقسـى واقـف لـه=قلايعه خيـل الشيـوخ المشاهيـر
وضيف الله اليا منه شبا العود ظلـه=تفرح به الزرفات واللي مصاغيـر
عز القبيلـه والفخـر حاصـل لـه=يرد حياض المـوت دون المغاتيـر
وغالب ليا منـه وقـف وقفـة لـه=يبيع عمره عنـد تالـي الخواويـر
مع الكرم حلـو النبـا عـادة لـه=وعند الرفاقه لـه معـزة وتقديـر
عـود معقبهـم عسـى الله يحلـه=الله يجبره مـن شوايـب زمهريـر
عقاب ميـراث الفخـر ورثـة لـه=اهـل الربـاع مشيديـن الدواويـر
مستارثيـن المجـد دقـه وجـلـه=عقب حـرار أوكارهـا بالعناقيـر
وكـم فرقـوا مابيـن خـل وخلـه=بضرب المهند والسيـوف البواتيـر
شيوخنـا سـم الكـبـود المغـلـه=ترعى بهم وضح عليهـا البواكيـر
لهـم فـي نجـد العذيـه سجـلـه=مركاضهم يشبع به الذيب والطيـر
ياما أخـذوا قطعـان بـدو محلـه=غير العبيـد مقولمـات المساميـر
يفوح صـدري والضمائـر مغلـه=لاحل طـاري ناطحيـن الطوابيـر
وبعذر عيوني لـو دموعـي تهلـه=على اللي يقدون الظعن والمظاهيـر
اللي لهم في ماضـي الوقـت سلـه=كم تيهوا بالخـوف حـم مقاصيـر
هم درعنا لاجـت علينـا عضلـه=وحنا الذي ننطح وجيـه المسافيـر
كم ذود مصلاح مـن المـاء نجلـه=مابين خلف وحيل غيـر المعاشيـر
وكم بيـت شيـخ باللقـاء نستحلـه=وحنا الذي ناقف على طيـة البيـر
وكم وادي عقب السيل حنـا نحلـه=وقطعاننا ترعي اليهـق والنواويـر
وكم وادي نجع الذويبي نزلـه لـه=إن جاه من نـو الثريـاء شخاتيـر
وكم ديرة عقب العياء بحـوز تلـه=إن أسنـدوا وإلا ليـال المحاديـر
وكم شيخ عقب العز شـاف المذلـه=إليا أدبرت خيـل وخيـل مناحيـر
وكم منهـل نجـع الذويبـي يحلـه=أيام صـولات العـرب والمغاويـر
وكم مـارد قطعاننـا يـاردن لـه=في لاهب الكنه وقبـل المخاضيـر
وكم فارس فـارق بـراد الأظلـه=بضرب اللويصق والحرار المساطير
وكم واحد مضهـود بالقلـب علـه=شال الحمـول الكايـده والقناطيـر
ماله جدى غير البكـاء يـوم هلـه=يصفق بالكفيـن ودمعـه شخاتيـر
مع زايد العبـرات مـع فحـة لـه=مشقوق جيبه مامعـه ربـع تفكيـر
عليـه مـن مـر الليالـي شكلـه=ضاقت فضاهـا والليالـي مدابيـر
وزبن على اللي كـل عقـد يحلـه=عقب الذويبـي كانهـا بالعياطيـر
بالجـاه والحيـلات والمـال كلـه=وإلا النمـش لاعـودوا للمشاطيـر
شيوخ تحوش المجدهـم هـل لـه=غير الشجاعه والعطاء فعلة الخيـر
يلقـى الـذراء مـن حوالـه مقلـه=واليا التجـأ ماحسبـوا بالمخاسيـر
يعطونه المقـدار مـع حشمـة لـه=في راس عيطاء من علو الشناظير
اهـل بيـوت بالنـوازي مطـلـه=ومجالسن تاقف بها الرجل وتحيـر
تلقى الشحم والهيل فـي رفـة لـه=والعود يدرج فـي معـزة وتقديـر
ماحسبـوا بالمـال كثـره وقـلـه=شيالـة الكايـد بربـح ومخاسيـر
وربعه بني عمرو وهم عـزوة لـه=لاشانـت الخطـر ولابـه معاذيـر
في عزهم يعتـز وهـم فخـر لـه=ويطوعون اللي براسـه سعاطيـر