المشاركة الأصلية كتبت بواسطة لافي

ياحمامة يوم مرَّينا تنوح=في حرى حيٍّ تأخر بالمغيب
شيب عيني ساقته بنتٍ جموح=ميَّلت في حبها عقل اللبيب
والله أنه مابعد ذا الروح روح=يرحم الله راعي الرأي الصليب
لايغرك هالسروق اللي مزوح=وش يفيد إليا وصلتي للمشيب
السنافي لو يسكَّن في صروح=ما يخلِّي من يهمِّه .. لو يشيب
السموحة كان عندك لي سموح=أو قبلتي بالنصيحة من غريب
الكلام يروح وتطيب الجروح=وكل جرحٍ ما يداوى .. له طبيب
غير جرحٍ لو يعالج مايروح=السَّهام اللي تصوَّب من قريب
ما يُوثِّق سر للرجل الطموح=الأصم اللي آذانه ماتصيب
ولا يحدد نوْ .. برَّاقٍ يلوح=من يخايل بالعيون اللي عطيب
والنتيجة دون تطويل الشروح=أو حكاية لاتودي ولا تجيب
لا تدور زرع في أرضٍ ملوح=ولا تعلِّي بيت في بطن الشعيب
قلتها وإن كان مافي البوح بوح=هي نصيحة ياتصيب وياتخيب