التناصح مرحمه من لدن رب ٍ رحيم = ورحمة الله شجرة ٍ نستظل بضلّها
والنصيحه من ذهب من تجاهلها غشيم = وانا مادورتها غير من كفو ٍ لها
احمد الله سيرتي الكريم ابن الكريم = اعرف ادروب المراجل واعرف ادلّها
حكمة الله حددت فوق كل عالم عليم = من وهبه المعرفه غايته ياصل لها
وقتنا يابو بدر صار بافراحه عقيم = شاين ٍ يابو بدر بالخلايق كلّها
قلنا كيف العمل خابرك رجل ٍ فهيم = مرهفات المعرفه لاطلبتك سلّها
شوفني ياصاحبي فالهوى قلبي سقيم = وش يداوي روح شخص ٍ تفارق خلّها
ونتي ونيتها واسمعوها فالقصيم = من ديار الاحمدي والدموع اهلّها
غدرة الايام صابت فوادي بالصميم = بعد ماهي جاتني من نفوس اجلّها
تستكن صدورها نار تاكل فالهشيم = كل ضر ٍ صابني مايبرد غلّها
والمشاكل كلّها جات من يم اللئيم = بعد رتب كذبته للعرب وارسلّها
والجهار ابو اربعه مايقابل بالسليم = انشد اهل الضومنه واللي يعرف دلّها
ارفع ايديني دعا في دجا الليل العتيم = اطلب اللي في يده عقدها مع حلّها
والقصيده ختمها نطلب الرب الحليم = الصلاه الوافيه في نبيك صلّها
عد ماهب الهوى عد ماهب النسيم = وعد ماهل المطر فوق الارض وبلّها