ياراكب اللي مسيره يقطع البيدي= مصخر البعد قطاع المسافاتي
سود الخطوط الطويلات السراميدي= وحمر السهال العراض المستطيلاتي
والصعب والبعد ماهو صعب وبعيدي= على عريض الرفارف والكفراتي
الفجر يمشي من العارض بتحديدي= يوم أدبح الليل ونجومه مطلاتي
مع خط عرعر وأمره وأقطعه سيدي= متوجه ٍ غرب مع خط القرياتي
حيث أن فيها رفيق شوفته عيدي= يوم الفرح والتهاني والمسراتي
قدمي يمدد زلول الترك تمديدي= ويمدلي بالطريق عقود لمباتي
وعودٍ على الجمر ودلالٍ بغاديدي= واذناب حيل متانٍ مستديراتي
جلبن على السوق من حزم الجلاميدي= مع شايبٍ فيهن أنظاره بعيداتي
من بيض الايام في وجهه تجاعيدي= ومجرب السوق واسلوب اللكاعاتي
قالوله البيع قال البيع تفريدي= وساموا وقالوا تبيع وقال هيهاتي
حنا جلاليب ماحنا شحاحيدي= والسوم هذا ترى ماهو ثمن شاتي
مير ابعدوا يالطماميع الحواسيدي= يجيني الجزل ذباح الجزيلاتي
اللي يحقق طموحات الاواليدي= الاسم نااايف ومجده بالمنيفاتي
متجودٍ في حبال المجد تجويدي= لو مامعه مال وظروفه صعيباتي
والطيب له في جسد راعيه تجسيدي= ماهو مزاج يجي ويروح صدفاتي
الليا بغى المرجلة خض المواريدي= ولا صابه البخل لو راحت ولاجاتي
لو إن في جيّته مالي مقاصيدي= الا المحبة وتجديد العلاقاتي
ولو العلاقات ماتحتاج تجديدي= لكن نبيها تبادل للزياراتي
قطع العلاقات واخلاف المواعيدي= ماهو بطبعه وانا ماهي بعاداتي