سلام يا زارعين الطيب = يا أهل القلوب الحياويّه
أجراحنا تطلب التطبيب = عجزت للقى دوا ليّه

منا لكم كامل الترحيب = ترحيب صافي على النيّه
عجّل و هات المثل يا ذيب = تلقى لها اوصاف طبيّه

عسى البقا صاحب التجريب = و الغصن من عذبنا ريّه
حلو الثمر ما يشوبه ريب = و اللي جنوه الغناويّه

الشمس عن وقتها ما تغيب = من عافها يدرق الفيّه
و ما بين امسك و هات و جِيب = حلو الثمر للهواويّه

اللي رضي فيهم التقليب = يموت و يحيا على السيّه
حلو الثمر للهنيّ اقريب = و يا بُعد مجنى العناويّه

خابر رجايه معك ما يخيب = و نظرتك ميه على ميّه
عد الخطا و ازهره بالطيب = تفتح لك اقلوب ورديّه

جينا و حنا لنا ترتيب = و سلوم الاجواد مرعيّه
لكن جازى الصواب بعيب = و القلب صابه لظى الكيّه

يا كيف تجني ثمر ما يطيب = و اجذور الأثمار مسقيّه
واجب على ثمرهم تعقيب = يعدّل أحوال ملويّه

لوكنت عالم بحال الغيب = هاجرت من ارضهم ذيّه
من قابل البشر بالتقطيب = هل أتبعه في ردى غيّه

قدّام راسك عليك يشيب= و اتسير في ادروب منسيّه
اشطب على ودهم تشطيب= و صفحات الايام مطويّه