الشعر له ثقل الدوافع موازين=به حكمة الدره عسيرة نوايل
إلا على عقول الرجال الفهيمين=مثل بن مدخل للجزيلات طايل
ولي المثل جاله مجال وبراهين=وهيضني اللي لأجمل القول قايل
وأطلقت قيد معقلات مساجين=بنات فكري عاشقات الجزايل
لولا نزر جزله يصومن من سنين=يا أهل الأدب يامالكم من فضايل
دروع الأدب عن محدثات المعبثين=يمن بكم من شر دهر وغوايل
وسابك مصاغ عيار واحد وعشرين=بعرفه مروض شاردات جفايل
ونضم بهن نضم البيوت المثامين=لهن عن الهسه حصانه وحايل
أهلن هلا ماغطرفن المزايين=وماشعشع البراق بين المخايل
وما لحن القمري شجي الملاحين=وماسيلة جون الودق من مسايل
ترحيبة المشتاق في شوف غالين=درة مصاغير جزعها الشمايل
ساقه مساق العود الأزرق من يمين=معزب تحفى للضيف قدر وبجايل
لا هنت يابو زيد عقب العزيزين=بالسلم والمذهب تليد الأوايل
رد الثنا معروف بين الوفيين=نهج الرجال مقدرين الجمايل
وحنا بقبيلة حرب دايم فخورين=اليوم والا يوم دور الأصايل
مرين في حاله و بأحوال حلوين=أمجادنا به معجزات هوايل
قبيلة يعرف بها الصدق والدين=وتحمد بعز النفس بين القبايل
وذخر الرجال رجال مبطي و هالحين=بدور الزمن تحديد حال الفعايل
ومسك الختام العنبره والرياحين=أزكى الصلاة اعداد نبت الخمايل
على النبي خير الرسل والنبيين=اللي بهديه كف هدي الرسايل