صباح الخط والمشوار والتحضير والدفتر=صباح اليأس والأحلام عسى الله يفرج الكربه
صباح اللي فسوق المال يضارب والقهر يخسر=صباح آمال تجدّد لذاك اللي سكن غربه
صباح التاجر الطامح فكم مشروع وهو يحذر=يخاف من الفلس يخشى كفيله يوم يغدربه
اجل ما عاد باقي شي به احلام الفتى تذكر=اجل يبقى على حاله يجيه الراتب النكبه
يروح الثلث في قرضه سداده بالسنة وأشهر=وياخذ ثلثه الثاني اجار المسكن وغلبه
ويبقى ثلث متشتت فواتير وهموم أكبر=طعام عياله ووضعه اكيد احوالهم صعبه
اجل منهو يلّم القرش يحاول والرجا يقدر=يجييله يوم يلقاها حياته شرحه ورحبه
همومي يا هموم الناس اشوف الحال يتدهور=تجي ازمة بعد ازمة نسلي نفسنا بكذبه
بأن الوضع يتحسن ويبقى حلم لا اكثر=الين الله يفرجها وتحقّق لنا رغبه