في ليلة الجمعه وفي ليلة السبت = في ليلتينٍ تالي اليال الاسبوع
لفا علينا غاليٍ فيه رحبت = رحبت به ترحيب مثني ومربوع
يامرحبابك ياهلا عقب ماغبت = خمس اسنوات وحبل ملفاك مقطوع
طال الغياب وفي غيابك تسببت = للارض قحط وللبهايم ضما وجوع
جانا الدهر من يوم عنا تغيبت = كم اجدبت بيرٍ وكم جف ينبوع
وكم يوم في راس الطويله ترقبت = اراقب اقدومك من اربوع لربوع
الشكر لله يوم بالديره آصبت = جعلك بعد ما اصبت بالخير متبوع
غيثٍ هنياً مرويٍ يحيي النبت = سقيا من الرحمن رحمه به انفوع
يقطع ضما الضميان ويربع الخبت = يفرح عباد الله والضر منزوع
يابرق يابرق الحيا يوم قربت = هلت عيون اللي تباشر بك ادموع
من يوم خلتك من هموم الشقا طبت = وانا من اول من غثا الوقت موجوع
جبت الغنايم معك في لفوتك جبت = مسيرٍ بامرالله اللي له الطوع
يالله تبعدنا عن الياس والكبت = ندعي ونطلب والدعاء حق مشروع
يالله سبحانك لك اسلمت وانبت = ترحمني بيومٍ به تحاسب اجموع
انا بشر ما احصي كم اخطيت واذنبت = الادمي ماينظمن نوبٍ يتوع
يالله تقبل توبتي بعد ماتبت = ياللي لعفوك تسجد اعبادك اخشوع