الالف ابكتب فوق بيض الصحايف= كل اللي بقلبي ولاني بخايف
لاواحسافه ماتفيد الحسايف = اقرى تواليها على حوض الادراك
ادراك حل وطال حال الوقوفي=لاكلمة(ن)سرْت ولامن يروفي
جنيت محصولي وكله حسوفي=وشعاد لو قلبي بساتينه اشواك
والبابعيني شفت حضي مقفي=اقفى ولاشي(ن)لطرده يوفي
ياغير كلمات(ن)بصدري ترفي=واشدي بها لو قالوا الناس مااغواك
يعيبها اللي مايعرف الخوافي=خوافي(ن) بالقلب مثل الفيافي
قل المطر فيها وزاد الجفافي=عجاجها لزهور الاعمار فتاك
والتا توالت بالضماير طعوني=الوقت قاسي والخلايق جفوني
والنوم عيا لايزاور عيوني=ولاعاد تبغى قرب هذا وهذاك
عافت جميع الناس عيني وملت= ولااضنها مع بعض الانفس تسلت
مادام نفس اللي نوده تخلت= عنـْا وباعت عهد صافي مثل ذاك
والثا ثمين الطيب ماعاد يجدي= والوقت عيا لايباريه وجدي
مافاد صبري لاولافاد جهدي=وازريت ماعندي مفاهيم وادراك
ماعدت فاهم وش يدور بزماني=ولاادري وش اللي يم همي حداني
واليا قضى هم(ن) طرى هم ثاني= مشكاي للمعبود دوار الافلاك
والحاحياتي ماتسر النواضر =واليا طلبني واحد(ن) قلت حاضر
مااقدر على ضيم المخاليق اناضر=ولاضنتي بشكي لذولي وذولاك
اشكي على الوالي عضيم الجلالي=هوالوحيد اللي عليم(ن) بحالي
هو داري(ن) فيني وفي ماجرالي=وياالآدمي ماغير واليك يرعاك
والخاخويي مالقيته خويي=ولاادري مع الوقت الغبر ويش اسوي
وحيد اسابق خطوتي في تروي=ماامشي على درب(ن) وانا فيه شكاك
ماامشي قبل لاادري وش الدرب صاير=لو كنت في مجلاسي اليوم حاير
ولو انها دارت علي الدواير=ولو قيل شف حالك على وين وداك
والجيم جرحي طال ماله مداوي=واضنها خابت جميع الرجاوي
لاواحياتي ياحياة الشقاوي=ولايافوادي مااعضم اليوم بلواك
بلاك ربي بالحياة الكسيفه= من يوم فارقت القلوب النضيفه
معهم حشى مايوم وافتك خيفه=واليوم صدق اليوم شف ويش وافاك
والرارموني مخلفين العوايد=في هرجة(ن) خلت جروحي جدايد
ياليتني مازرتهم يوم اعايد=وياليت ربي يااسود الوجه يبلاك
ولْ ياعسى يبلاك رب البرايا=بلوى شديده لك تجرالبلايا
او انها تكثر عليك الخزايا=ولاني بشمتان (ن) على كل ماجاك
والزا زعلت امن الزعل فار دمي=واصبحت مدري ياعرب وين ايمي
ماهمني مدح البشر لي وذمي= الحال باري صاير(ن) مثل مسواك
حالي برت من علة(ن) داخليه=عله على كل الخلايق خفيه
لي نيتي والناس تمشي بنيه=والكل يمشي وانت ياوين ممشاك
والدال دبـْر حضنا واحسافه= مدري رداة الحظ والاكسافه
في كل يوم يزيد بعد المسافه=واقول ياقلب العنا وش خطاياك
مكتوب والمكتوب مافيه حيله=لازم يجي مابين يوم(ن) وليله
يجي على العاصي وراع النفيله=الصبر ثم الصبر ياقلب يرفاك
والذال ذكرك يافقيد العشيره=بالقلب مالي غير ذكراك سيره
انا اشهد ان النفس عقبك كسيره=فرقك عن العالم لنا زاد حسناك
تملك عن العالم فروق(ن)كثيره=فرق العمى عن فرق راع البصيره
والامثل فرق العلن والسريره= الله يصيب اللي قوى يوم ينساك
والسين سبب لي فوادي بلاوي=يومه تقطع فيه حبل الرجاوي
نجمي طفا ماعاد نجمي بضاوي=وهوانت يانجم السما ويش ضواك
ويش الذي ضوْانجوم السماوه=غير النجوم الثانيه والصفاوه
هذا يضوي ذاك مابه غشاوه=محضوض يانجم السما الكل ضواك
والشين شاب القلب والراس ماشاب=وكل ماتقفل باب لي ينفتح باب
مدري وش العله ولااعرف الاسباب=حذراك ياغافل عن النذل حذراك
حذراك لاتتبع سقيم(ن) يظلك=يغويك وانت تفكر انه يدلك
رافق عزيز(ن) لانصيته يجلك=واليا ظهر منك الخطا بيْن اخطاك
والصاد صافي الوقت ماعاد صافي=والنفس فيها امن الزمان اختلافي
وش حيلتي بانت جميع الخوافي=رحماك ياللي كل خلقك برجواك
رحماك ياوالي جميع الخلايق=ماعاد لي حيله ولااملك طرايق
فارقت كل الناس حتى الرفايق=والاانت ياوجه السعد وين شرواك
والضاد ضيم الناس ماهو بقاضي=يبعد عن المليان ويصيب فاضي
لو هو ضعيف ومايقضْي مقاضي = لازم يجيه الضيم مامنه فكاك
مامنه فكاك(ن) ولافيه شكه=ولوهو يبدل سكته باالف سكه
ولويترك الدمام ويروح مكه=لابد مايرمون في دربه اشراك
والطا طفح كيلي من الوضع ياناس=حالي تردى وانتكس دون مقياس
ويالايمي وقف ترى الوضع حساس=كف الملامه عن طواريك نفداك
كف الملامه لاتجيب الملامه=ترى الملامه تنتهي بالندامه
ان كان عندك بالقضايا فهامه=وقف وقلي وش على اللوم جراك
والظا ظلام الليل في تالي الليل=زود عذابي والشقا والغرابيل
سهران اراعي نجمة الصبح وسهيل = وبالله ياقلب العن ويش عناك
الاجروح(ن) فيك عيت تطيبي=والاهقاوي كل ساعه تخيبي
والاانها ازوال(ن) تبين وتغيبي=مدري ولكني بك اليوم شكاك
والفا فهمتك ياخبيث الطبايع=ياوامر ٍ(ن)نفسك لفعل الشنايع
لالاتبجح وانت لاابليس طايع=شرْق وغرْب بس لاتقرب خطاك
لالاتجي عندي دقيقه واشوفك=لو انك تزوْد علينا حلوفك
حنا فهمنا شي دايم يطوفك=وانت الذي كل المواجيب تخفاك
والقاف قالوا بالليال القديمه=الصمت عن بعض السواليف شيمه
والصبر في كل القضايا حشيمه=للنفس عن درب القساوه والاهلاك
درب القساوه والقساوه مصيبه=هي تودع قلوب الشبيبه مشيبه
ولابد ماترْث جروح(ن)عطيبه=والقلب تقدح به مثل قدح الاسلاك
والعين عيا الوقت لايستويلي=واصبحت قلبي بالحنايا دليلي
واليا عدلت الحال عوْد يميلي=عزاه من حال(ن)غدا فيه دكاك
دكاك دك حصون عندي منيعه=وانضر قلبي من فعايل مريعه
دايم لها صكات تاتي سريعه=يالله دخيلك من تصاريفها انخاك
والغين غاب الفكر والبال غايب=بيني وبين افراح قلبي مصايب
مليت من دنياي دنيا العجايب=ولازودها الانقص لو كانه اغراك
يغريك زين احوالها من عطاها=لاشك تخفي عنك حارق عناها
ولابد ماتنكس على مبتداها=دنياك ماتثبت على حال دنياك
والكاف كررت العطايا ولافاد= واصبحت انا اعرف القضيه والابعاد
من دون مانذكر رديين واجواد=كل(ن)على فعله توازيه الاملاك
من كان يملك طيب نفسه تطيبي=والخايب المنبوذ لازم يخيبي
طبع الزمن لاصار ماهو غريبي=ولايفيد اللوم خالين الادراك
واللام ليت البال يرتاح مره= لاشك مابالناس راعي مسره
كل(ن)يلاقي غايته الف مره=ولافيه احد ياقلب به يوم بداك
احد(ن)يروح وحاجته يهتديها=واحد(ن)يضيْع حاجته لو يبيها
وانا عيوني نومها مايجيها=ياعل هاجدها حياته للاهلاك
والميم مدْات الكريم امعروفه=مايبدي الزيزوم فيها كلوفه
وامن الردي لازم تبين النكوفه=عنها يتمنع دوم ويبيْن ارباك
الدون ماينفع ولابه فوايد=غلطان ياللي منه ترجى السدايد
لامايفيد الدون وقت الشدايد=وان جيت يمه في مواجيبك ارداك
والنون ناحت كل ذكرى قديمه=عندي لها في وسط الاعماق قيمه
وبي علة(ن)منها وعله مقيمه=وبكل حزه تحتويني وتشناك
تشناك ياحظ(ن) تسوق البلاوي=ولااضنها تنفع بفعلك رجاوي
صديتني واخلفت كل الهقاوي=كم لي وانا تسوْي سواياك وانهاك
والهاهموم القلب صارت كثيره=ودموع عيني فوق خدي نثيره
ابكي خفا وانوح مع كل سيره=ويالسقم ويش اللي مع الوقت طراك
ويش الذي طراك عندي وجابك=غير الهموم اللي خذتني لبابك
مازال فيني حي ذكر لصوابك=ومازلت حاديني على المر برضاك
والواو وين اليوم ذيك الصداقه=خلاص ولت مابقالي رفاقه
والمبتلي كد بان فيه احتراقه=ومما حصل يالمبتلي ضاع مبداك
مبداك ضاع وضعت بين التهايم=اللي تجي من زود هرج اللوايم
وياللي تلوم النفس كلك جرايم=لالاتلوم النفس واللوم ياطاك
واليا يعجز القلب يرتاح مما=صابه ونابه من هواجيس جما
ومهما حصل يبقى كما الصخر اصمْا=ماشكوة(ن)تجرح لو السر فتاك
فتاك يفتك بي ولامنه املْي=كله ولادرب(ن)يجي منه ذلي
وياشاكي(ن)للناس وقْـف وقلي=وشفيك ماتشكي على الرب مولاك