ياذيب انا هيضني اعواك ياذيب =يوم العرب حدوك بالجنبخانـي
مغير تقنب فوق روس المراقيب=وهذا الزمان اللي حداك وحداني

واحلفت لعوي لين تصفا المشاريب= ثم اتعشا من كبوشن سماني
واسوق سوق القاف ابيات واجيب = واروض ابفكري صعيب المعاني

انا احمد اللي عزنا عالم الغيب= هذا زمانن فيه أمن واماني
تحل المحاكم فيه كل المطاليب= حتى العدا بالامس صاروا خواني

صحيح لاشكن بقولك ولاريب= لكن ضاع الحق يومن رشاني
الملعبه صارت بيدين الاصاحيب= هذاك ولد إفلان وهذا فلاني

ياذيب لاتنحب ولا تكثر إنحيب=الذيب رابض وسط قطعان ضاني
روح زمان الذيب قفوابه الشييب=وصار القلم من فوق حد السناني

وان غاب نجم سهيل نجمي ولايغيب= هذا الجدي ثابت مكانه مكاني
لاجاك يومن له سنون ومخاليب= الذيب يفرق لو يجور الزماني