مطلق

ياسلام الله على اللي ما يخونون الأمانة
يسهرون الليل والعالم من الراحة رقودي

يعدلون ويصدقون ولا يعرفون الخيانة
حاكمن شعب الكويت وحاكم الشعب السعودي

صياف

مرحبا بالمسلم اللي به قوانين وديانه
وانت جندي لاخو مريم والفهد ذخر الفهودي

يا طويل العمر ما يصلح شجيع بلا ذهانه
واحدن ماله ذهانه لا يسوق ولا يقودي

مطلق

الحريبي لو لقاله واحدن يقطع لسانه
ما تغزّل في بنات الهند سمحات الخدودي

ما درى راشد محارب يوم يسرج في حصانه
كنّه الفارس يبا يغزى النصارى واليهودي

صياف

يا عتيبة قولوا لمطلق يمرّح في مكانه
ما يدافع عن بنات الهند يا غير الهنودي

خل ابن سرحان يقضي حاجته فأول زمانه
الشباب اليا انهزم ما عاد للمسلم يعودي

مطلق

أعجبك صوت المغني يوم دق الاسطوانه
مار لا ترقص عليها وانت قرد من القرودي

انت لو انك صغيّر ذقت مس الخيزرانه
مير شفتك عود مابك فود جعلك ما تعودي

صياف

والله اني لامسك حلوق العرب كيد ولعانة
والرصاصه من حزامي والشرارة من زنودي

وانت عينك يالثبيتي مثل لون البرتكانه
مثلها هاك السنة صفرا ما تنقص ما تزودي

مطلق

لا يغرك واحدن خداع لو ابدا ثمانه
الرماح اطول رموشه والصواريخ النهودي

انت حربي من رجالن ما يعرفون الرطانة
مار لا ترطن ولو حصلت من تحت اللحودي

صياف

انت ذيب ولك سنون ولك تحت بطنك بطانة
ما تعشى من كبار الروس يا ذيب الرقودي

الحروب اخذوا فلان وسلموهم لفلانه
اسمع الكلمة ولا تجحد ترى عندي شهودي

مطلق

واحدن قلبك يحبه ما اتفق شاني وشانه
والغنيمة دسّها تحت العباة ام اللبودي

الثبيتي في مكانه ما تحرّك عن مكانه
وانت نارن طالعن دخانها من كل عودي

صياف

يصبح الصبح وتبين الشمس وتطير السمانه
وانت طيرن ما نبتلك ريش والوقت محدودي