تقول يادكتور كثر من النوم
والنوم ساس الوم مابه خراجي
في غير وقته لوم واكبر من الوم
مامعه رزق ومايعدل مزاجي
وانا هوايه خايعٍ تو ماسوم
بين الجبال وبين هاك الزراجي
جوه عليل ولطفه ريح قيصوم
والبرق جاله بالسحاب اللتعاجي
ماياصله ياذيب من للمره روم
لاقلت سجينا تعذر وماجي
محروم ياراع الشليهات محروم
من سجةٍ بالبر فلة حجاجي
ومفارقة خبلٍ على الكبد جاثوم
عنيد وعلومه لجاجة حراجي
لو ماتحبه فيه مجبر وملزوم
قربه مرض وفراق مثله علاجي