لاتخاف غير اللي سميه من النار
شجاع في وقت المثارى يثاري
غيره ترا الديره من ايمين ويسار
ماعندها من طاري الشر طاري
تلقى بها مابين الانقاض ثوار
مافيهم اللي فيه تقدر تماري
ياناس ياصبري على كل ثرثار
وقتٍ منزلني نزول اضطراري
وانا مثل حرٍ على كف صقار
لاحام ماحامت بجوه حباري
والله ماخشى غير رفاع الاضرار
ماني ضعيف رابعه يابو ساري
اكيد عندك علم عن بعض الاسرار
لاتقول لي ماني عن العلم داري
ان كان رجلك عن مداهيل الانصار
مبطي مضريها لبوج السحاري
يكفيك عن بوحي وسردي للاخبار
تلقى يابن غانم عليها شعاري
قريت بيتٍ فيه حكمه وتذكار
يطري عليه لاطرت لي طواري
مجادل العاقل ضعيفين الابصار
عقيم ويعرضك شامت وزاري
سعد المحمدي
::::::::::::::::::::::::::::::::::::::
جتني بيوتاً من سماء الشعر مدرار
بيوت شاعرها ،، محنك مهاري
من رجل له بين الرجاجيل مقدار
شاعر على صد العداه انتحاري
ما ساق له بين المعاذير معذار
سلطة لا جاء اللازم وقف ما يداري
وانا معي هاجس ليا قمت ما احتار
ردي على اللي جات ماهو اختياري
يا سعد جعلك من طويلين الاعمار
من يجهلك قلبه من الصدق عاري
درع القبيلة درع لا صار ما صار
على الكبود المغرضه سم هاري
حرٍ شهر عالي سماء كله احرار
نهض ما له طمعه بجول القماري
خابرك لا جات المواقف والاشعار
تقصف يا ابو تركي قصف ما تشاري
واليوم للشهره مفاتيح وانظار
خل الضعيف اللي قريّب محاري
ما كل فرد تلد يمه ليا ثار
يكفيك عن مغزاه عازل حراري
خلك على ما قال طرقي ومرار
ما انته بسوق الهزل بايع وشاري
نايف غانم المحمدي