كلن على تفكير عقله ومرباه
اما يجيلك ذيب والا دجاجه
سلم على اللي بالمواقف عرفناه
رجل على الطيبه ينومس مزاجه
والا الردي خايب وضايع وعفناه
ماله مكان ولانبي منه حاجه
من قدم المعروف لابد يلقاه
يلقى مواقيفه ويلقى نتاجه
لو جاته الدنيا على غير مشهاه
لابد بعد العسر فيه انفراجه
الله كريم وكل خلقه ترجاه
ولاخاب عبد يطلب الله حاجه
يالله عفوك كل يوم انتمناه
وغفران ذنب ماينومس خراجه
وطيب يجملني مع الناس وابغاه
وبعد عن دروب الردى والعواجه
البارحه والضيق عندي من اقصاه
مدري وش اللي دك صدري وداجه
عليه مضمون القصيده بنيناه
وعليه هاجوس الشعر واندماجه
عبدالعزيز مناور الرويثي الحربي