الله من صبر كما صبر يعقوب=على زمانً بان فيه اختلوفه
من سايرٍ ما هو بساير ومنسوب=ساير عرب ولا القوادي تعوفه
ضلا الوفاء بين الرياجيل مرغوب=وكلٌ على فكره يكرم ضيوفه
طِيب النبا حُسن القِبل قن ماجوب=هرجة صديق الله مصدق حروفه
الضيف يأنس به ولو كان مصيوب=صَفطت معازيبه تسلي شفوفه
ومن سابق الايام والضيف مكتوب=منَّاح طالات الوفا بمعروفه
واليوم وقت إيلبس الثوب مقلوب=من واحدٍ ما ضيفته بمخلوفه
قومٍ بِنَاهُم فالوفا بنّيَت الطوب=الساس ماشي ساس والطوف طوفه
الكلّ من ضيفانهم صار مرقوب=من كل صوْب وصورتين امخطوفه
صار الوفا بين الرياجيل مغلوب=ذلول مجد ونغمتين امعزوفه
والضيف صاير لب الاعلان منصوب=وإشهارة الداعي بيان الكلوفه
ما كنه الا جايب الضيف مطلوب=يُشهِد على ضَيّفِه وذبحة خروفه
ولَّا الوفا للضيف والضيف محبوب=يوم ان كلٌ ما تطيعه ضروفه.
الطِيب من باب الوفا صار مسلوب=اصبح على الضيفان معول عزوفه
فالمستحي مغلوب والتَرك مهيوب=على وجيه المستحين بنشوفه
من دون تلْبِيِت الوفا تركت النوب=تلاوم الضفران كثر الحسوفه
ومن كان في سَلّم المواجيب محسوب=وده يجي ويروح محدٍ يشوفه