صارت ربوع المملكة عندنا غير = من فضل خالقنا عزيز ألجلالي
هل السحاب وفرحوا الناس بالخير= هلت هما ليله جنوب وشمالي
في نجد يا كثر الفرح والتباشير =جات العشا يا من صدوق الخيالي
احدٍ يقول السيل جانــا محاديـر = واحدٍ يقول الماء مع السد عالي
وحتى الحجاز بفضل ربي تياسير = غيث وطا رأس الجبل والسهالي
وشرق البلاد يزين فيه التعابير = في كل وادي قالوا السيل سالي
وطابت تعاليل البدو والمسايير = يازين جلستهم بجنب الدلالي
بجنب الدلال اللي تشاعل مباهير =كيف يقدم من يدين العيالي
والعود الازرق بينهم ياعلي دير= يدار به ما بين جمع الرجالي
ودارت سواليف الرجال المشاهير = والكل ينصت للعلوم الجزالي
حييت ياذكر الوجيه المسافير= ذكر الرجال اللي لهم قدر عالي
اللي ما تعجزهم صعاب وعواسير = يحلونها ما يحسبون الريالي
من دون واجبهم ما حطوا معاذير= اذا نصاهم من همومه ثقالي