سلام ياذكرى مضت عايشتها واليوم طيف = تزورني وتشوفني بالطيف وانا اشوفها
الجادل اللي غيرها مايحتوي قلبي وليف = الحب شمسه ماتغيب ولا كساها كسوفها
لو شجرة وصاله ورقها مسقطه منها الخريف = حيّه مدام عروقها حيّه وتحيي جوفها
تستعذب اسماعي شذا صوته ليامن قال سيف = ماكن لو مره سمعت حروف غير حروفها
افز وإليا طيف عابر راح مثل بروق صيف = اقفت على مزونه رياح ٍ عاتيه وتحوفها
اصبحت مثل اللي تشوف عيونه وعوّد كفيف = لو هو يناظر في عيونه راح منها شوفها
استسلمت رجلي لضرف الوقت بالوقت المخيف = واستسلمت روحي وترجي نيلها لشفوفها
انا اشهد ان الصبر حمل ٍ ماهو بحمل ٍ خفيف = بعض الجمال الحمل لاثارت يقص كتوفها
عشرة سنين وشلت فوق الكاهل الحمل الكليف = واظن زادت قبل مده والعرب بضروفها
مافيه حب ألذ من حب ٍ على النهج الشريف = حتى ولو ماشافته . حتى ولو مايشوفها