عز الله إني صرت بالـحيل مشغول = مشاغلن تأتي على غير قانون
أمضي الأيام في جو معزول= مابين شيل و حط و السر مكنون
أخذت لي مدة و أنا أجول و أصول = أشيلها من هون و أحطها هون
أسوقها و تاصل حراوي اسطنبول = لعلهـا تنسى بعض ما يهرجون
الشعر دار و قبلنا صار منـزول = يا مكثر اللي في بحوره يغوصون
به شي ما يقبل و به شي مقبول = يذكرني المجمـاج و إلا ابن لعبون
كم لي و كم لي كم و أنا ودي أقول = يا مرضيه يا مزعله وش يقولون
آخاف أقول يقالي ماهو معـقول = على مزاج أفكار ناسن يضنون
ناسن اتحملها على غير محمول = يبيعون فيها بالمتاجر و يشرون
جاهل جهل مجهول في بطن مجـهول = أبعد من المريخ و أدنى من الدون
يقفي و يقبل به من الحول للحول = يسجن به السجان في سجن مسجون
ما دله الدلال من غير مدلول = الناس معها أسماع و قلوب و عيون
عدى و هدى و انطلق منه هملول = و شلون من ما شلون وشلون ماشلون
سلمى تطق طبول و عيونها حول = الواقفين بعينها تقل يمشون
بعيونها يطلع لها الزول كم زول = يمكن بياض العين غطى على النون
ما تستريح و بالمخاليق مهبول = زهاب أهلها دايم الدوم مطحون
يومن تجي بأخلاقها مثل بهلول = و يومن سوات الطين من دون في دون
جاريتها لو مشيها مشي مشلول = قدامها أغني مواويل و لحـون
وصلت معها مفرق الطرق بسهـول = و بانت و هانت و انكشف كل مضمون
عقب عرفت الحجم بالعرض و الطـول = ما أقص أثرها بين صاحي و مجنون
ذبحت أسيرن دونه الباب مقفول = خليت راسه تحت الأطباق مدفون
و إن جاتني من مصـدرن غير مسؤول = تركتها ما كنها غيـرت لون
ثم استشرت اللي له الرأي مفـتول = ما خابوا اللي بأمرهم يستشيرون
قلنا نحايلها بحيلات و حلول = و مهما تسير انسير و السيـر مدهون
و إلا نرد الصاع بالصاع مدبول = الله جعل راع العصى ضد فرعون
أهم شي إليا انقطع راس أبو هـول = باقي الأمور ادور الأيام و يهـون