راكب اللي تقل تعطي تحايا=نور الاشاره لا ضوى يسار ويمين
تصميم من فكر العقول الدهايا=ماصمموها في تخرص وتخمين
واللي فرق في صنعها والسوايا=عرفٍ عليها مثل وزن النياشين
لب الجنوط ولب ذيك المرايا=ولب المقفى لاغدى الليل ليلين
بالوجه وسمٍ مايعوق الحلايا= وسمٍ تشكّل في جبين المصلين
استغفره مير المزايا مزايا=اللي عليها قمت اجر التلاحين
فيها من اللي حمّلوها شضايا=من طايرات الميق واحد وعشرين
بي ام دبليوا ماتخلي بقايا=حازت على كل الحسن بنت برلين
عليها اباوصّل سلامي ثنايا=للي على الخوه طليق الحجاجين
خوة رشيدي غير كل الخوايا=عزام بالشده وعزام باللين
هذا وقلبي هز عوج الحنايا=من هزته عيّت تضخّ الشرايين
حط النقط على حروف الهجايا=الحال مزري ماتفيد التطامين
بنجد العذيه وضعنا كالجلايا= بين المطارق روسنا والسنادين
شيٍ تشوف العين ماهي حكايا=وسمع الاذاني غير عن شوفة العين
احدٍ ضحك واحدن يجرالبكايا=ينهلّ دمعه لاسمع طاري الدين
حلقٍ روي واحلوق عطشا ظمايا=بطنٍ شبع بطنٍ ترصه حصاتين
واسبابه اللي لابسين العبايا=بعض العبي سترٍ لبعض الجثامين
اللي بطرفها يحجبون العطايا=لاسلم يردعهم ولا منهج الدين
اخباث المذاهب واصلين العلايا=سفالٍ رقت على كتوف المساكين
بينت نبذه والبلايا خفايا=نبذه قصيره تشرح الواقع الشين
واقع يصور مخلفين الوصايا=اللي دنسها دنّس الما مع الطين