مـسـاعــد الـجـلـيــدي =
البارحه كـنّ الحماطـه بجفنـي=شيٍ لجا بيـن العيـون وبلحّهـا
على وليفٍ مانعسّف لي عسفنـي=بعيونه الخـدرات حالـي ذبحّهـا
عنده جراءه دارنـي واختطفنـي=كسّر مقافيـل الـدّروج وفتحّهـا
عـزالله انـه بالمـودّه كتفنـي=رمحه سطا بين الضلوع وسطحّها
صبرت لين الصبر زاد وكشفنـي=عيني عقب فرقاه دمعي فضحّهـا
ياسف لحالي بالهوى من عرفني=قصة غرامي تتعب اللّي شرحّهـا
وجدي على لاماه خـلٍّ حرفنـي=عن جملة الخفرات عيني لفحّهـا
ادعج غنج ياحمود حبّه شغفنـي=هنّيت من جاب الصّداق وربحّهـا
خالـد بـن عبيـد الاحـمـدي=
قريت خطّك يالعزيـز وصرفنـي=عن بعض قيفان الشّعر لاطرحّها
ذكرتني باللـي هجـر مانصفنـي=عكّـر عليّـه بالحيـاة ومرحّهـا
طلبت ولفه خير ..شـرّه ولفنـي=ومشاعره في ولف غيري سرحّها
باقوى صواريخ القطيعه قصفنـي=وليته يداوي مهجتي من جرحّهـا
ياليت حضّي فالهـوى ماجرفنـي=بدروب نايب حزنها عن فرحّهـا
بطني تعاف الزّاد جوعي نحفني=حتى تسبب جوعها فـي قرحّهـا
حضّي بدنيـاك العجيبـه كرفنـي=ضاقت عليّ اجبالها مـع برحّهـا
تشكي على حمود..الحزن يكتنفني=ويمكن جروحه بالهوى مابرحّهـا
دنياك مقلوبـه للاحبـاب تفنـي=فيها عنا يخرب صفى مسترحّهـا