صفحة من الماضي محا رسمهااللمس = تلوح من لمس الأصابيع ملسا
فليتها للنور بطرافها رمس = وطويتها والليل بالأرض ماامسا
مرّتبي القدرة على مجلس الأمس = ووقفت به للغد واليوم وامسا
باقي تناتيفٍ حمسها الدهر حمس = غيدٍ حمسها تالي القيض حمسا
صافحتها بمعشرقاتٍ من الخمس = خمسٍ عليهن للمواجيب خمسا
معالمٍ كانت طمسها البطى طمس = كتبٍ طمسها رايح المزن طمسا
اقفيت منها خاطري ضايقٍ عمس = أكثر من ابن سرور ضيقة وعمسا
خواليٍ للريح بورودها همس = حديث عشقٍ بين الاحباب همسا
النمر دمّى بمقلته بالزمن نِمس = ونمرود عرشه طاح وافناه نِمسا
قريت بالدنيا على حاجب الشمس = حرفٍ من الياقوت بخيوط شمسا
حرفٍ غمسته في لهب ضامري غمس = حتى غمس غض المعاليق غمسا
الليل خلاّ الارض واجبالها دمس = والصوت ماله مع دجى الليل رمسا