ارسل سلامـي للمشاكيل الاخـيـار = عبـر الفضا والقوقل افضل وسيله
إمعطره بالطيب مـن نفح الازهار = للقـرم ابـو نايف زبين الدخيله
حـرْ ولد حـرْ ومـن نسـل الاحرار = منزالـهـم بالنايفـات الطـويله
من يوم كانـو مابها زيف وغبار = اهـل المكارم والعـلوم الجزيله
ابمدح الوافين من جـزل الاشعار = مـن هاجسن ما يـعـرف المستحيله
إمـروض الصعبات قبـطان الابحار = سريـع فـي كسـب الجـزال لعميله
والمدح للي هم طويلين الاشـبار = ياجـب على الشاعر وفكـره دليله
من بعدها يالصاحب الفكر محتار = سبـت شـراذيـم العصـور الهويله
تعاونو بالظـلـم ضحلين الافكار = ليـن قبـست نيراهـا بالفتـيـله
تكاتفوا والشـر عنوان الاشـرار = كـلـن علـى الفتنه يشجع زميـله
تفجـر الموقـف وزادن الاخـطـار = كـل يـوم نسـمـع للكوارث حصيله
وصلت بـلاد الشام باسباب بشـار = لا بارك اللـه فيه واللي يلي له
كثر الجثث من شافهن طاح منهار = والـمسلم ادنـى مايخلخـل صميله
لا شاف اخوه يطيح من رمـح غدار = لـو المنـام يـمـر مـا يهتنيله
حنا نـود الخير والسلم للـجار = ونروي من عدانا السيوف الصقيله
طنخة شجـاعه ماتهيبنا الاقـدار = يعني نموت اهون مـن اللي نخيله
وش له نعيش بشوفت الذل والعار = وش عـاد باقـي فالـزمن نحتريله
وانته يابو نايف عزيزْ ولك شار = كيـف اتصـبـر والـسـويدا عليله

يامرحبا ترحيب حشمـه ومقـدار = ترحيب يحسـب فـرض ماهـو نفيله
ياشــــاعرً مابين تموز واذار = اسندت قافـك والعمـيـل لعميله
ما عـاد بـه منه ولافيه معذار = ومنهو تعنـا واجـب انا نجـيله
فهد فهد نسـل المشاكيل الاخيار= وفـا وطيب وكـــاسبً للجمــيله
تشكي مـن الايـام والوقت غدار = والوقت به ياصـاح عدلـه وميله
كـم ازهقت نفس قبل وقت الاسحار= وكم بنت عذرا تغتصب كــل ليله
وكـم احفرو قبرً وكم هدمـو دار= وكم انتخو في جامعتنا الهزيله
فـي جامعتنا لعبت البس والفار= كلن يدور له مع الوقـــت حيله
ووضع العرب مابين خاين وسمسار= مهلـه ورا مهلـه وحطـه وشيلـه
توافقو شله هــل الذل والعار = واغواهـم الشيطان شيخ الرذيله
روح بعد حســــني معمر وعمـار= واللـي بقا لا بـد ياتـي بديله
واللي يشب النار يصبر علاالنار= يقولها اللي فالسـيـاسه حصيله
ارض الجلد لو هـي صلافيح وحجار= تحولت ربلــــه ليا سـال سيله
الفيصــلي اللي مثل ظلع سنجار= الحمـل لامــنه نـوا يرتكـيلـه
ابشر وبشرلـي هل الشـام بخبار= النصر قـادم بين يـوم وليلــه