ياراكب اللي ليا جاله تونداقي=يقلع مدى ضيقة الخاطر تونداقه
مواصفاته تهيض كل ذواقي=وصوت اشتغاله يوسع صدر سواقه
لونه تحت ضو قرص الشمس لهاقي=في طوكيو مصنعه وبنجد عشاقه
هو منوة اللي عنه تعميم الحاقي=وهم اهل الثار يقتاده ويستاقه
زاده ذواقه وشربه فوق مايطاقي=يشرب من الماء ويطبخ دم معلاقه
نار القهر والغبن محرقته احراقي=يقفي ويقبل وصلو النار باعماقه
تصلفقه قلة الحيله تصلفاقي=يقضي نهاره وليله ماثنى ساقه
نصه رفيق الرفيق المولع الشاقي=بالطيب من يوم رف الشوف باحداقه
محمل في تحياتي وباشواقي=وقل لابوسامي تركت العشق واسواقه
بشر حسين النبا والشكل بافراقي=واخذ يانداء مني بشاره على فراقه
وش عاد لو هز زينه كل خفاقي=ولا عاد للي يشوفه بالصبر طاقه
عزلت عشق ام عين رمشها دقاقي=وبدلته بعشق وضحاً شوفها شفاقه
انا بدوي ونويت اشري لي نياقي=عقب ابن بتلاء ذعار اهدالي الناقه
كم لي وانا للنياق الوضح تواقي=وشجعني اللي عساها تكثر ارزاقه
ابى لاحنت رعود ولاح براقي=نو هماليل وبله ماهي دقاقه
امشي باثرها ووجه الشمس ماواقي=مع ضف ربع مافيهم قاطع الساقه
اتبع هواها واجر الصوت مشتاقي=في مرتع قبلها عشبه مااحد ذاقه
روض نوامي حياه اشكال وارناقي=طياحها مثل حذف المرو باشناقه
جو نباته زماليقه لها اعناقي=وزهوره اجمل شذاها من شذا باقه
من شم ريحة هواه من العمس فاقي=نسى التعب والهموم وزانت اخلاقه
دنيا تقلب وتخلف هقوة الهاقي=والعمر لابد ماينصاب في عاقه
العمر والمال يفنى والله الباقي=سج القدم وانبسط مادام لك فاقه

ياسايق الجيب جعلك ماانت سواقي=ابطيت تمشي وهاذي ماهي سواقه
طال انتظاري وانا واقف على ساقي=اتعبت رجلي مابين الباب والطاقه
الناس ناموا وانا في حروتك باقي=يامرحبا اقلط ولافي عطني اوراقه
تقهو لين اني اقرأ كل الاوراقي=واعطيك رد الرساله كان لي طاقه
يامرحبا في قصيد الشاعر الراقي=اللي له الناس ولهانه ومشتاقه
شعرمثل شعر لافي ماله املاقي=انا على كتابته ماعندي لياقه
لكن ابى اكتب مردي والله الواقي=من نقد ناس تجي للنقد منساقه
الجو توه صفا والفكر تو راقي=وكتبت ماجادبه فكري من افاقه
يالافي حمود شعرك يغدق اغداقي=على مسامع محبينه وذواقه
انته جبل من جبال الشعر عملاقي=وقصايدك ياوسيع العرف عملاقه
علمك في ساحة الامجاد خفاقي=وراية قصيدك بجزل الشعر خفاقه
ويمناك للي تجيبه تنفق انفاقي=تصرف معاشك على الضيفان والحاقه
دايم لمبدا رجال الطيب سباقي=يانسل ربع على الطالات سباقه
دامك لشوف النياق الوضح عشاقي=تستاهل اللي عطاك ذعار(لهاقه)
ابن الحميدي له الاشعار تنساقي=نفسه لحب العطاء والطيب تواقه
يامغرم بحب وضح تبحل الناقي=لوشافها هيف يحسبها من نياقه
لاشك يسرق غلاها منك سراقي=لاشفت من زينها يجذبك براقه
لاتامن القلب نوب القلب بواقي=لاتله الشوق تل الصقر مسباقه
ويازين ياللي جمالك بعضه عراقي=احرص ترى عيون بعض الناس سراقه
حسن اختيارك دليل لذوقك الراقي=يازين ياللي عطاه الزين خلاقه
عقل وجمال وكمال ودين واخلاقي=وبينك وبين القمر في ليله علاقه
لو ان لافي يشوفك صابه ارهاقي=يكتب بك الشعر لين يخلص اوراقه
انا اشهد انك عذاب لكل عشاقي=قلته شهاده لزينك ماهي عشاقه
قلته وصدري من الاشواق ماضاقي=مرتاح مااحب لابنت(ن)ولاناقه