يامرحبا ترحيب يالله حيه = ترحيبة(ن) ياسبع في شهر الاحسان
ترحيبة(ن) من عزوة(ن) حازميه = معروفة(ن) يشهد لها كل الازمان
نصيتني بعلومك الواقعيه = تشكي من اللي خاطرك منه زعلان
هذي تراها مشكله عالميه = الكل يشكيها على اوضاع والحان
لكن نبيها لحن للسامريه = ماهو هوى لاشك ماني بطربان
الامر هذا فيه سبعين ليه = يحتاج لك تجمع مع اخوانك اخوان
وحسب حسابك كم شريت المطيه = وقارن وسدد وطلب الله غفران
والادمي يعمل على المقدريه = مايفتح لنفسه على الناس بيبان
الشغل ماهو لعب طاق وطقيه = الله مسجلها بأيات قران
والكل يحسب قبل روحه مجيه =يبغى مكاسبها ولايكون خسران
والحمد لله خالق(ن) هالبريه = خالق جميع الناس بشكال والوان
واللي غلط ينصحه دايم خويه = واللي نصح تلقاه في عالي الشان
اهل الفكر والعقل فيهم رويه = يطفي لهيب النار لو كان بركان
محظوظ من يلقاء نصيحه هديه = من بعد ماكانت نصايح بالاثمان
جاتك نصايح كلها شاعريه = من قلب عارف بالتجاريب ريان
ان طعتني ياسبع سوى سويه = فكر على هونك ولاتكون سهران
وطلع على مرقاب مثل الحويه = وصدر قراراتك وانا ضمن الاعوان
اكيد تلقاء الحل ميه بميه = والله يديم الخير في كل الاوطان