لو كنت يا جدي على الارض موجود=يمكن يصيبك شي فوق احتمالي
خابرك ما ترضى من الناس منقود=على سلوم ابآك ترقى المعالي
لكن تغير عقبك الوضع ياالعود=ضاقت علينا عقب وسع المجالي
تقدر تقول إن الأمل شبه مفقود=راعيه ماطاق الحمول الثقالي
دام التواصل قلّ والطيب مجحود=والمصلحة سادت على كل حالي
وحبل الرفاقة بين مرخي ومشدود=والي يبي يشده بخشم الريالي
وحيل الذي يبغى النواميس مهدود=وجده على ذيك السنين الخوالي
واليوم جفت قدّمه اعدود واعدود=وتلّ الرشا عوّد به العدّ خالي
طلع لنا في ذا الزمن شلقة قرود=أهل العقول الي دخلها الهبالي
ولقوا لهم تأييد من ناقص الفود=عطاهم التقدير .. بأول وتالي
فعلً ينرفزني ومن زود في زود=ومشيً على غير الطريق العدالي
راحوا هل النخوه وفتتهم الدود=أهل الجمايل محتمين التوالي
غنيهم يبذل على الطيب مجهود=ما شحّ ماله لو تدور الليالي
وفقيرهم يكرم لو الدخل محدود=ولو هو على بساط الفقر ما يبالي
يرقون في روس الطويلات بسنود=حاميهم الله ذو الفضل والجلالي
راحوا يا جدي مثل ما رحت بلحود=( وآ عزتالي صدق وآ عزتالي )
شيً طرى يا جد مع هبة النود=ماهو على ماقيل نسج الخيالي
تقدح به أفكاري كما قدح بارود=بعيد عن نظم البيوت الهزالي