يامل قلب هواجيسه يفرنه= فرّة سيور المكينه بالملاهيبي
موتر جديدٍ وكن دريوله كنه= معه صويبٍ مصوب بالمحاديبي
اركى على موتره بالقيض يوم انه= لمح خويه يغيبّه تغاييبي
برضٍ خليه وثارت بندقه منه=رحلة قنص من وراء ذيك المراقيبي
يسابق الوقت والافكار يشعنه= لاراح. من هو يصدقني ويدريبي
ومن حر مابه عروق القلب تلنه=ثم صاح له صيحةٍ .وين انت يامجيبي
ومابين يمكن ولايمكن ويمكنه=جريت لي ونةٍ تحت التراييبي
وسجيت بالهاجس اللي قام ينحنه= شرايد الفكر في دنيا التلاعيبي
دنياً تغير بها المفروض والسنه= ماعاد اميز مابين الصح والعيبي
قليل منهُ يجي ضنك على ضنه= لويصفي الزاد ما تصفا المشاريبي
وبعض الاوادم شياطينه يكزنه= مندوب شيطان من شر المناديبي
سيف النميمه شياطينه يسلنه= فارقت بسبابهن حيٍ يهليبي
وانا من اللي هموم الوقت صابنه= علمت وايقنت من كثر التجاريبي