بعض العرب يزداد بالطيب كمله=طبيعته ماهو كلام ومقالي
اهديب شامٍ ماشكا جور حمله=يرسي لها كما رسُو الجبالي
راضي على مقسومه اللي قسمله=مايشتكي من جورها والتوالي
ملاذ ربعه في لزوم/ن/لزمله=ينقظ لهم باللازمات الحبالي
نادر وجود وعملته واي عمله=مثل الذهب ما غيّرته الليالي
جديد عهده مع قديمه وسمله=لا طب بالميزان يرجح عدالي
ياعل يجمع مع اهل الخير شمله=لامات في جنات خلد/ن/عوالي
وبعض العرب ما له على الطيب صمله=لو راز حمله مايشيله محالي
ماقدم من الخير لو ظفر نمله=دايم مكاسيبه علومٍ هزالي
بنيانه اللي بان فيه انهدمله=هشاش جرف و مايلٍ للهيالي
صبخى جفافٍ لوتسقيه همله=ماتجني ألا ملح لو ماك حالي
قافٍ خطر لي يوم فكري زهمله=ماهمني من يدعون الكمالي