ابوي وصاني وابحفـظ وصايـاه=ماني بناسيها لـو العمـر طالـي
يومه يعلمني وهو فـوق مركـاه=عسـاه دايـم بالمجالـس قبالـي
وعسى السعاده ماتفـارق محيـاه=وعساه يبطي حي طـول الليالـي
حيثه من اللـي نـادرات مزايـاه=وفعله ينومس كل رجـل موالـي
في منطقه حكمه ومزيـن حكيـاه=وفي وقفته يشبه كبـار الجبالـي
وليا عطى يعطي ومكثر عطايـاه=تعطي يمينه دون تدرى الشمالـي
ولاجاه مضيوم من الوقت واسـاه=واشتال حمله لو حمولـه ثقالـي
وليابغيت اعـد واجـد سجايـاه=شي خفـا منهـا وشـي طرالـي
منه خذيـت دروس علـم مقـواه=منها استفيد بكـل درب ومجالـي
الدين ثم الديـن حـذرا تناسـاه=عمودها لاقـام جـاب المعالـي
ويرضيك بالدنيـا وبالقبـر تلقـاه=وتقلى جوابك يوم عرض السوالي
وجارك تحمل منه لاشفت عوجاه=لابد له يـوم يطـوى الرحالـي
ورفقه ردي الاصل لو زان مبداه=تاخذ لهـا مـده وتعلـن زوالـي
والطيب اللي روس الاجناب مجناه=اخير من خايب ولو هـو موالـي
والضيف لاجالـك تكثـر تحيـاه=وتقومه له قومه عزيـز وغالـي
وبنت الردي حذرا تغرك حليـاه=يجيك منسـب خالهـا بالعيالـي
وهذي قليل مـن كثيـر وصايـاه=ماني بناسيها لـو العمـر طالـي

حي الكلام اللـي جزيـل بمعنـاه=على جزيل القول ماشـن عدالـي
يقطف زهـور مـن كـلام تبنـاه=اختار الجليـل ولارجـع للحثالـي
اشكـرك يابنـدر بيوتـك مصفـاه=مثل الذهب قولـك ونقـد الريالـي
مانته بمثل اللي يبى الدرب واخطاه=تاه بظـلام الليـل والـدار خالـي
والا انت تعجبنـي بقولـك ومبـداه=وظنـي بطيبـك ثابـت مايزالـي
وعساك من ياخـذ فعولـه بيمنـاه=بكسب الفعـول الطيبـه والمعالـي
وعساك من ينجـح بدينـه ودنيـاه=وبالصف الاول مع صفوف الرجالي
وأوصيك يابندر على الصعب ترقاه=وخل الهزيله للضعـوف الهزالـي
وترا الفضيله طاعه الرجل مـولاه=ويختار عن مر الحـرام الحلالـي
ومالله كتب جالـك لوبـه مـراواه=واللي حرف عنك صعيب المنالـي
ويالله ياللـي كـل خلقـه ترجـاه=ياواحـد فـوق السمـوات عالـي
توفقـه بمقـدم العـمـر واتــلاه=ويقوم في طاعه عزيـز الجلالـي
وتم الكـلام اللـي عزيـز بمبنـاه=وصلاه ربي عـد رمـل السهالـي
علـى نبـي كـل ماحـل طريـاه=صفوه قريش اللي مشـى بالعدالـي