خلو الشاعر يباري للنسايم=اكثر التحطيم يقتل للقريحه
والزعل يوجد مع الشعار دايم=واكثر الشعار نيتهم صريحه
شاعرٍ يزعل ويحرق بالعمايم=وشاعرٍ يزعل وترضيه بذبيحه
شاعرٍ شغله متابعة الولايم=ومن نساه يقول يالله لاتبيحه
يدحم الشعار وعلومه صتايم=وشعر مختلطٍ مليحه مع قبيحه
ما يميز بالوسوم وبالوسايم=لاسمعته خير من شعره قحيحه
القصيد يردده للناس دايم=ملو الشعار من حمضه وشيحه
وشاعرٍ يدعم جهوده بالعزايم=طيب المنهاج وعلومه فليحه
لانفاق ولا غرور ولا نمايم=ولو يطيح الشعر يزعل من مطيحه
لايعيل ولا يفطر كل صايم=ولا يمد الناس بالكف الشحيحه

مجاراة القصيده

يا علي روس الاصايل بالشكايم= لايهمك من تمنح له منيحه
الشعر له راس وعيون وقوايم=وكل عودٍ يجذبك من طيب ريحه
البروق تلوح به والجو غايم=والمطر عنا العجاج ابعد نزيحه
شاعرٍ لاقام يجلى للوايم =مثل ابو حدين ما يبرى جريحه
الحقايق ثابته شرق النعايم=الله انه يرحم العود بضريحه
وشاعرٍ لاصاحي ولاهوب نايم=كان ودك تخسره قله نصيحه
كن غيره ما يذبون الخرايم=لو تقول طويق قدمك قال ازيحه
من علومه لو تجي بعض الظلايم=كثر خيره كان ما جاك بفضيحه
القطامي في هواه الطلق حايم=ما يجاوب هرجةٍ ماهي فصيحه
الجدايد نفسها نفس القدايم=لاتقول السالفه ماهي صحيحه
عل يفدى خاطرك كل الهلايم=ان كلوا مترديه والاَ نطيحه
الظفر بضعيف نفس من الهزايم=والمسبه من وضيع اكبر مديحه
وانت شعرك يروي شفوف الضرايم=من قصيد العصر الاول فيه ليحه
لو تصدقت بذهب خمس الغنايم=مابقى مفتون ما اخذله صفيحه

علي هليل الحربي









هاذي مجارات الشاعر حمدي العوفي مشكور

أشهد أن الصدق والعلـم الملايـم =قاله الحصني وشاهدنا صحيحـه
بالبيوت اللـي توقـع بالصمايـم =وضح المفهوم بحروفـن فصيحـه
عادته بالشعر مايرضى الهزايـم =وأن طرق له طرق ماتسمع فحيحه
بيًـن الشعـار بخطـوط وقوايـم =كنه ايقول أسمعو هـذي نصيحـه
شاعرن يمدح وطمعتـه الغنايـم =وباالدراهم تنفجر معـه القريحـه
وشاعرن جوه مع الشعـار غايـم =كل ليل وصبح تسمع منه صيحـه
وشاعرن بالحب واللوعات عايـم =وكل حزه يبكي فـراق المليحـه
وشاعرن للجزل ماجاب الهلايـم =يكسب النـدر وكسبـان المديحـه
خلو الشعـار يعطـون الخرايـم =والسما والارض للعالـم فسيحـه
ودام للشعـار مايوجـد قسـايـم =التزاحـم شـي مايمكـن نزيحـه

صح لسان كل من الشاعرين

بصراحة قصيدة ومجارة بقمة الروعة

لكما جزيل الشكر على هذا الابداع