يابو شهد عيني لك حدودها=لمحه تمر ولاتعدى حدودها
وتبقى في عيني صورة الزين ثانيه=وادله ونفسي هانيه في ركودها
والشوق ماهز المشاعر ولافها=ولا بقلبي ناميات ورودها
لكن ولكن صارماكنت حاسبه=يوم السحايب موحشات رعودها
سحب الغرام اللي تلاعج بروقها=صكت علي وقيدني قيودها
بسوق النخيل اللي دخلته وليتني=ماشفت زول اللي تمايل بعودها
عود الغرام اللي تمايل وهاضني=بالميله اللي ثوّرت من زنودها
صابت بها كل المشاعر بميلها=والحال فشلت في جزايل جهودها
اجهدت حالي في تجاهل جمالها=عل وعسى نفسي ينومس صمودها
لكن فشلت وزايد الشوق هامني=واستسلمت نفسي لمنهو يقودها
اللي سحرت عيني وقلبي وهاجسي=وخلت جزال القاف ترقى سنودها
تمشي وانا عيني تمقل بـزولها=مفتونة باللي تزبر نهودها
للبس فاتن والحلا من رحيقها=والنور يكشح من نعومت خدودها
اليا اقبلت كل الصبايا تبعرثت=وقامت راحهن تطحن في وجودها
غارن وزعلن والزعل وش حصايله=دام الصبايا كتلة من جنودها
هي التي تامر وتنهي بقولها=وانا الذي نفسي تبيّح سدودها
اواه يانفس تزايد غرامها=واواه يانار تزايد وقودها
نار الغرام اللي رمتني سهومها=وخلتني اقسم دخلتي لا ماعودها
ماعود دخلت سوق هيّض مشاعري =لو كنت ظامي والروا في عدودها