سيرتك ياعردان ماهي بسيره = .........زمانك صاير فيه تبديل

هيض عليه صاحبي بتعبيره = ساق المعاني لون سوق الفناجيل
يالله لعله ساكني ما يثيره = وإن ثار عندي للقوافي مصاقيل
فيضٍ يفيض من البحور الغزيره = مثل الحديث اللي على كل تاويل
سلام من شاعر محكم ضميره = سلامٍ احلى من حليب الاباهيل
عكشٍ وبرهن والاباهر كبيره = وضحٍ تقل بعيونهن دارج الميل
ونشيرهن بين الجوازي نشيره = وبيض الحباري عندهن له دحاميل
والقاع من نوّ الثريا مطيره =ومن كل ناوه دارجات الهذاليل
سلام وافي من عشير لعشيره= سلام مابه يارفيقي مداخيل
والا سلامك ما عرفنا مصيره = شكل ومشكلني بكثر التشاكيل
ماشوف به رفقه ولا اشوف ذيره = انظف من الصابون وافضل تعاليل
وعردان صقارٍ كشف راس طيره = يحسب مدابير الليالي مقابيل
هذاك وقته مايغير مسيره = ورزقه على منشي صدوق الهماليل
والزرع يا هايس نصحني خبيره = خطا غطا شمس الضحى بالمناديل
وصنعه ماهي ليه عليه عسيره = وانا ماجيك من الفضا للمحابيل
شقران طاره بالطريفه خشيره = جبل نهار وفي دجا الليل قنديل
ونجره ينادي كل حزه فطيره = وعنده لمن ظامه زمانه تنافيل
خلف سلف يضفي على الجار خيره=متوارثين الجود جيل بعد جيل
اول فزوع اللي شبوره قصيره= قبل السنين امشيخات الجماميل
هذا زمانٍ مامعي به بصيره=ينقص مكاييلي ويوفي مكاييل
والحرب يا هايس اليا طق زيره =ابشر بحيل جاد به جيد الحيل
لبيك وان شفتم من الضد غيره= قرم جروحه بالضماير مكاميل
يوم السنين حروبها مستطيره = سجيل حنا وانتم حجار سجيل
عنا لكم بالظاهره والسريره=من يوم كنا لين ينفخ سرافيل