يابو عوض يا ريف من قال وينـك=يلقاك في رجم الشرف دايـم الـدوم
ليا جاك ونيـان الجهـد يستعينـك=متحيـرٍ فكـره مثـل قاعـد النـوم
يفـرح ليـا شـدت يمينـه يمينـك=من عقب ما يمشي عن الدرب منجوم
ان جا بعيد الناس.. وان جا خدينـك=يضحك حجاج اللي تنصّـاك ملـزوم
قولة هلا يـا مرحبـا فـي جبينـك=يوم الردي كنه على الخشم ملطـوم
فزت بشرف دنيـاك وأمـور دينـك=لا جايـبٍ نـمـه ولا نـاقـلٍ زوم
دايـم رفيقـك كنـه صبـي عينـك=عن ما يمس شعور صاحبك معصوم
الله يمتـع فـي توالـي سنيـنـك=ياللي طواريقك بعيـدٍ عـن اللـوم
شرحت وضعك والعـرب عارفينـك=يدفعـك للعليـا تقاليـد وسـلـوم
بعض البشر لو تعتزي بـه يهينـك=لازم يحـط برفقتـه رايحـة ثـوم
عجزت لا افهم يـا زمانـي رطينـك=لكن عرفت إن العسل منك مسمـوم
وما ينتفسـر بيـن خبثـك وزينـك=لا أقول لك طاهر ولا اقـول مذمـوم
مـدري نديـن النـاس والا ندينـك=يبدي لنـا حـدا الطرفيـن متهـوم

الشاعر الكبير / عضيب هليل بن شلاح العلوي الحربي.