ياقـلـب جـعـل الله بعـونـه يعـيـنـك=على الحزن لا حط له فيك مرسـام
الحـزن هــزك لـيـن بـيّـح كنيـنـك=على فراق أغلى بشر بيـن الآنـام
حال القضـى يابـوي بينـي وبينـك=وأحلا سنيني روّحت مثل الأحـلام
عشت بكنفك سنين واليـوم وينـك=ياعـونـة الله ياتـصـاريـف الأيـــام
اقفـت عـن الدنيـا وعنـي سنيـنـك=لكـن خيالـك ماهجرنـي مـن الـعـام
لك صـورةٍ بالبـال تحـزن حزينـك=مرسومةٍ من دون ريشـه ورسـام
صـورتـك يــم المقـبـره شايليـنـك=تعـرض عليّـه كـل ليـلـه ولا أنــام
والصـوره الأخـرى تذكـر حنيـنـك=صـوره حقيقيـه تعيّشـنـي أوهــام
أقـلّـب الـصـوره واقـبّــل جبـيـنـك=وابكي وأنا مكسور خاطر ومنضام
أنـتـه دفـيـن القـبـر وأنــا دفيـنـك=ياللي غيابـك قسّـم ظنونـي أقسـام
لكـن عزانـا فيـك صيـتـك وديـنـك=وإلا فراقك صعـب يامحمـل الشـام
عسـى كتابـك تاخـذه فــي يميـنـك=آمـيـن يالله ذو الـجـلالِ والإكــرام
وبجنـة الفـردوس تقطـف يديـنـك=مالـذ لـك يابـوي مـن كـل الأنـعـام
يـاحـي يـاقـيـوم عـفــوك ولـيـنـك=في عبدك اللي كمّل أركان الإسلام
وياوقت ذقنـا منـك زينـك وشينـك=لكن رضينـا ماقضـى الله بالأحكـام
وياقلـب جـعـل الله بعـونـه يعيـنـك=في وقت لو طال الفرح فيـه مـادام