لولا العيون أللي نظرها يمدي=ويشوف دارن فيه سيد المزايين
ما بت طول الليل أبني واهدي=واسهر طوال الليل والناس غافين
مع الهجوس أللي تجيب وتودي=ومع نفس تشكي شوقها للمودين
ويسيل دمعي فوق وجنات خدي=واحس جوف القلب مثل السكاكين
واقلبي أللي يشتكي فرق ودي=أللي حداه وحدني عنه حادين
ودي ظروفه جابته لين حدي=نظرة لطيفة جابت العين فالعين
وقلت السلام بدون مقصد وردي=لديت فيه ولد واحنا مقفين
مدري وش أللي صابني يوم لدي=ثارت بجوف القلب مثل البراكين
ونفسي تقول احط يده بيدي=وأمشي معه والناس ماهم بدارين
لاعندنا في الدرب جده وجدي=ولاربعنا بالدرب منا فريبين
لاكن سبايب صد ودي وصدي=الشرع وسلوم العرب والقوانين
على الأصول اعيش ما بحت سدي=وما بشتري الدنيا وفي الآخرة دين